پرەزيدەنت قاسىم-جومارت توقاەۆ پارلامەنت پالاتالارىنىڭ بىرلەسكەن وتىرىسىندا قازىرگى جاھاندىق قاۋىپ-قاتەرلەر مەن سىن-قاتەرلەر جاعدايىندا قازاقستانعا باتىل ءارى ناقتى شەشىمدەر قاجەت ەكەنىن ايتتى، دەپ حابارلايدى "ادىرنا" ۇلتتىق پورتالى.
مەملەكەت باسشىسى ەلدىڭ باستى ماقساتى – ازاماتتاردىڭ ءال-اۋقاتىن ارتتىرۋ، قاۋىپسىزدىگىن قامتاماسىز ەتۋ جانە ءومىر ءسۇرۋ ساپاسىن جاقسارتۋ ەكەنىن اتاپ ءوتتى. ونىڭ ايتۋىنشا، بۇل وڭ وزگەرىستەر تۇراقتى سيپاتقا يە بولۋى ءتيىس.
«سوندىقتان ءبىز قول قۋسىرىپ وتىرۋعا قۇقىلى ەمەسپىز»، – دەدى پرەزيدەنت.
مەملەكەت باسشىسى الدا تۇرعان اۋقىمدى ءارى كۇردەلى مىندەتتەردى جۇزەگە اسىرۋ ءۇشىن جۇيەلى، تاباندى جانە ناتيجەلى جۇمىس قاجەت ەكەنىن ايتتى.
«وسى كەزەڭدە بىرلەسكەن جۇمىسىمىزدىڭ قورىتىندىسىن شىعارىپ، ەلىمىزدىڭ ودان ءارى دامۋ جوسپارىن ايقىنداۋ قاجەت دەپ سانايمىن»، – دەدى مەملەكەت باسشىسى.
پرەزيدەنت مەملەكەتتىك بيلىكتىڭ جاڭا ارحيتەكتۋراسىن قالىپتاستىرۋ ماسەلەسىنە دە توقتالدى. ونىڭ ايتۋىنشا، قازىرگى شاقىرىلىمداعى پارلامەنت ساپالى زاڭ شىعارۋ قىزمەتىمەن جانە دەپۋتاتتىق كورپۋستىڭ جوعارى ناتيجەلىلىگىمەن ەرەكشەلەندى.
