قازاقستاندا قىلمىستىق كودەكستىڭ جاڭا 125-1-بابى («نەكە قيۋعا ماجبۇرلەۋ») بويىنشا العاشقى ەكى قىلمىستىق ءىس تىركەلدى، دەپ حابارلايدى "ادىرنا" ۇلتتىق پورتالى قازتاگ-قا سىلتەپ.
ەكى جاعدايدا دا جابىرلەنۋشى رەتىندە كامەلەتكە تولماعاندار جاسوسپىرىمدەر تىركەلگەن.
«ايەلدەردىڭ قۇقىقتارىن قورعاۋدى كۇشەيتۋ ماقساتىندا قابىلدانعان زاڭ اياسىندا نەكە قيۋعا ماجبۇرلەۋ ءۇشىن قىلمىستىق جاۋاپكەرشىلىك ەنگىزىلدى. وسى باپ بويىنشا العاشقى قىلمىستىق ىستەر شىمكەنت قالاسىندا جانە قىزىلوردا وبلىسىندا تىركەلدى. ەكى جاعدايدا دا جابىرلەنۋشىلەر كامەلەتكە تولماعاندار بولىپ تابىلادى»، – دەلىنگەن باس پروكۋراتۋرا حابارلاماسىندا.
زاڭعا سايكەس، ايەلدى زورلىق-زومبىلىق كورسەتۋ نەمەسە مۇلىكتى جويۋمەن قورقىتۋ ارقىلى نەكەگە ماجبۇرلەگەن ادامعا 2 000 ايلىق ەسەپتىك كورسەتكىشكە دەيىن (7,86 ملن تەڭگە شاماسىندا) ايىپپۇل، نە وسىنداي مولشەردە تۇزەتۋ جۇمىستارى، نەمەسە ەكى جىلعا دەيىن باس بوستاندىعىن شەكتەۋ نە ايىرۋ جازاسى قاراستىرىلعان.
ەگەر ارەكەت سالدارىنان اۋىر زارداپتار تۋىنداسا، جازا 10 جىلعا دەيىن باس بوستاندىعىنان ايىرۋعا دەيىن كۇشەيتىلەدى.
«اتالعان فاكتىلەر بويىنشا تەرگەۋ امالدارى جۇرگىزىلىپ جاتىر. ىستەر پروكۋراتۋرا ورگاندارىنىڭ ەرەكشە باقىلاۋىندا»، – دەپ مالىمدەدى باس پروكۋراتۋرا.
ەسكە سالا كەتەيىك، وسىعان دەيىن قازاقستاندا ستالكينگكە (قۋدالاۋ) قاتىستى جاڭا باپ كۇشىنە ەنگەننەن كەيىن دە ەكى قىلمىستىق ءىس قوزعالعان بولاتىن.
