ءبىر كۇندە ءۇش رەت. الماتى وبلىسىندا جەر سىلكىنىسى تىركەلدى

28 قىركۇيەك كۇنى تۇستەن كەيىن الماتى وبلىسىنىڭ اۋماعىندا جەر سىلكىنىسى تىركەلدى، دەپ حابارلايدى "ادىرنا".

قازاقستان ۇلتتىق دەرەكتەر ورتالىعىنىڭ (KNDC) مالىمەتىنشە، سەيسميكالىق ءدۇمپۋ استانا ۋاقىتىمەن ساعات 13:53-تە بولعان. جەر سىلكىنىسىنىڭ وشاعى نارىنقول اۋىلىنان سولتۇستىك-باتىسقا قاراي شامامەن 25 شاقىرىم جەردە، الماتى قالاسىنان وڭتۇستىك-شىعىسقا قاراي 247–254 شاقىرىم قاشىقتىقتا ورنالاسقان.

جەر سىلكىنىسىنىڭ ەپيتسەنترى 42,81° سولتۇستىك ەندىك جانە 79,89° شىعىس بويلىق كوورديناتتارىندا تىركەلدى. جەر سىلكىنىسىنىڭ ماگنيتۋداسى — mb 4,2, ەنەرگەتيكالىق كلاسى — K 9,4. وشاقتىڭ تەرەڭدىگى 7 شاقىرىمدى قۇرادى.

الدىن الا مالىمەت بويىنشا، جەر سىلكىنىسىنىڭ ءدۇمپۋى نارىنقول اۋىلىندا 2–3 بالل، ال كەگەن اۋىلىندا 2 باللشاماسىندا سەزىلگەن. الايدا KNDC دەرەكتەرىندە ءدۇمپۋدىڭ سەزىلگەنى تۋرالى اقپارات بولماعانى كورسەتىلگەن.

ايتا كەتەيىك، 28 قىركۇيەك كۇنى الماتى قالاسىندا دا جەر سىلكىنىسى سەزىلگەن بولاتىن. قالا اۋماعىنداعى قارقىندىلىعى 3–4 بالل دەڭگەيىندە تىركەلدى.

سول كۇنى تاڭەرتەڭ قازاقستان اۋماعىندا تاعى ءبىر سەيسميكالىق وقيعا تىركەلگەن. قۇتقارۋشىلار ونىڭ وشاعىنىڭ ناقتى ورنالاسقان جەرىن حابارلاماعان جانە دۇمپۋلەردىڭ الماتىدا سەزىلمەگەنىن مالىمدەگەن.

كەيىن الماتى قالاسىنىڭ توتەنشە جاعدايلار دەپارتامەنتى قالادا كۇشتى جەر سىلكىنىسى بولۋى مۇمكىن دەگەن بولجامعا قاتىستى اقپارات تاراتتى. سونداي-اق الماتى اۋماعىندا بولعان جەر سىلكىنىستەرىنىڭ وشاقتارىنا بايلانىستى جاڭارتىلعان مالىمەتتەر جاريالاندى.

قازىرگى تاڭدا كەلتىرىلگەن مالىمەتتەر بويىنشا ادام شىعىنى نەمەسە قيراۋ تۋرالى اقپارات جوق.