رەسەيدىڭ تۋلا وبلىسى ەفرەموۆ قالاسىنىڭ سوتى مەكتەپتە سوعىسقا قارسى سۋرەت سالعان وقۋشى ماشانىڭ اكەسى الەكسەي موسكالەۆتى 2 جىلعا باس بوستاندىعىنان ايىردى. وعان قارۋلى كۇشتەردى قايتا-قايتا «قارالادى» دەگەن ايىپ تاعىلعان، دەپ حابارلايدى “ادىرنا” ۇلتتىق پورتالى.
ەر ادام اتا-انا قۇقىعىنان ايىرىلماق. ال قىزدى بالالار ۇيىنە جىبەردى. بۇل رەسەي فەدەراتسياسىندا كەڭەستىك كەزەڭنەن بەرگى 37 جىل ىشىندە ساياسي سەبەپتەرمەن بالانى جالعىز باستى اتا-انادان الىپ كەتۋ وقيعاسى ءبىرىنشى رەت بولىپ وتىر.
2022 جىلدىڭ ساۋىرىندە سۋرەت ساباعىندا ماشا موسكالەۆا بالانى رەسەيلىك زىمىرانداردان قورعايتىن ۋكراين جالاۋى بار ايەلدىڭ سۋرەتىن سالعان. سۋرەتتە «ۋكرايناعا داڭق!» جانە «سوعىسقا جول جوق» دەپ جازىلعان.
قىزىن جالعىس تاربيەلەپ وتىرعسن الەكسەيدىڭ ايتۋىنشا، سۋرەت ءپانىنىڭ مۇعالىمى قىزدى سالعان سۋرەتىنە بولا قورقىتقان. ودان كەيىن پوليتسيا كەلىپ، بارلىق بالانىڭ مالىمەتىن جازىپ العان. الەكسەي مەكتەپكە كىرەردە، پوليتسيا كۇتىپ الىپ، اتى-ءجونىن سۇراعان، بىراق جالعىزباستى اكە باسقا ەسىمدى ايتىپ، قۇتىلىپ كەتكەن كورىنەدى.
“قىزىم: «اكە، پوليتسيا مەنى ۇستاپ الا جازدادى، مەن سۋرەت سالدىم»، - دەپ تىنىسى تارىلىپ، ۇيگە جۇگىردى. قىزىم قورقىپ كەتكەن، مەن كەلەسى كۇنى مەكتەپكە كەلىپ، ونى ساباق بىتكەنشە كۇتەمىن دەپ ۋادە بەردىم»، - دەپ جازدى وۆد-ينفو الەكسەيدىڭ سوزدەرىن.
كەلەسى كۇن الەكسەي ۋادە ەتكەندەي، مەكتەپكە كەلىپ، ەكى ساعاتتاي قىزىن كۇتىپ وتىرعان. ديرەكتور دالىزگە شىعىپ، ونى كورگەن بويدا دەرەۋ پوليتسياعا حابارلاسقان جانە ماشانى ساباقتان شىعارىپ، اكەسىنە قىزى سالعان سول سۋرەتتى كورسەتكەن.
«بالانى سىنىپتان شىعارىپ، تۇتقىن سياقتى دالىزگە الىپ شىققانى قانداي ۇيات! ولار ماعان: «بالاعا نە ۇيرەتىپ جاتقانىڭدى قارا! ول نە سالعان؟» دەدى. ال مەن : «سوعىسقا، قانتوگىسكە قارسى، ونىڭ نەسى ايىپ؟» دەدىم. ولار حاتتاما جاساپ، كۋاگەرلەردى – مۇعالىمدەردى شاقىردى، قول قويدى. ءبىزدى كولىككە وتىرعىزىپ، تەرروريستەردى جەتەلەپ بارا جاتقانداي الىپ كەتتى. ءبىز پوليتسيا باستىعى اندرەي اكسەنوۆكە كەلدىك. ول ماعان بالانى تاربيەلەۋ تۋرالى ءدارىس وقىدى”،- دەدى الەكسەي.
الەكسەي موسكالەۆ 1 ناۋرىزدا ودنوكلاسسنيكي سايتىندا ەلەنوۆكاداعى بۋچا تۇرعىندارى مەن تۇتقىنعا الىنعان ۋكرايندىقتاردىڭ ءولتىرىلۋى تۋرالى پىكىرلەرى ءۇشىن اسكەردى قايتا-قايتا «قارالاۋ» تۋرالى قىلمىستىق ءىس بويىنشا ۇستالدى. ءىستىڭ قوزعالۋىنا قانداي تۇسىنىكتەمە سەبەپ بولعانىن تەرگەۋ كوميتەتى قىلمىستىق ءىس بويىنشا ءوز بايانداماسىندا ناقتىلاعان جوق. 2 ناۋرىزدا موسكالەۆتى ۇيقاماقتا جىبەردى.
سودان كەيىن قامقورشىلىق ورگاندارى ماشانى كامەلەتكە تولماعاندارعا ارنالعان ورتالىققا اپاردى. سوت موسكالەۆتى ۇيقاماققا شىعارعاننان كەيىن دە، قىزىن ورتالىقتان شىعارماعان.
پروكۋراتۋرا قارساڭىندا موسكالەۆكە جالپى رەجيمدەگى كولونيادا 2 جىل وتەۋدى سۇرادى. سوت ەر ادامنىڭ ءىسىن ءبىر كۇن بۇرىن قاراپ، ۇكىمدى جاريالادى. سۋديا انتون ماليكوۆ موسكالەۆتى 2 جىلعا باس بوستاندىعىنان ايىردى.
Mediazona اگەنتتىگىنىڭ حابارلاۋىنشا، موسكالەۆ ۇكىمدى جاريالاۋ ءۇشىن اكەلىنبەگەن. ونىڭ قايدا ەكەنى بەلگىسىز. سوتتىڭ ءباسپاسوز حاتشىسى ولگا دياچۋك موسكالەۆتىڭ ۇكىم جاريالانعان قارساڭدا تۇندە ۇيقاماقتان قاشىپ كەتكەنىن ايتتى.
