باكۋدە پوليتسيا قىزمەتكەرلەرى رەسەيلىك «Sputnik ازەربايجان» اگەنتتىگىنىڭ جەتەكشىسى يگور كارتاۆىح پەن باس رەداكتورى ەۆگەني بەلوۋسوۆتى ۇستادى، دەپ حابارلايدى «ادىرنا» ءتىلشىسى.
جەرگىلىكتى باق-تىڭ مالىمەتىنشە، جۋرناليستەرگە «فسب اگەنتتەرى» دەگەن ايىپ تاعىلعان.
كۇشتىك قۇرىلىمدار رەسەي ەلشىلىگىنىڭ قىزمەتكەرلەرىن باق وكىلدەرىنە جولاتپاعان. قازىرگى تاڭدا Sputnik اگەنتتىگى نەگىزسىز ۇستالعان قىزمەتكەرلەرىمەن بايلانىس ورناتۋعا تىرىسىپ جاتىر.
ودان بولەك، بۇگىن «Sputnik ازەربايجان» اگەنتتىگىنىڭ كەڭسەسىنە ءتىنتۋ جۇرگىزىلگەن. Qafqazinfo-نىڭ ايتۋىنشا، كەڭسە عيماراتى قۇقىق قورعاۋ ورگاندارىنىڭ باقىلاۋىنا الىنعان.
ەسكە سالايىق، بۇعان دەيىن اگەنتتىكتىڭ ازەربايجانداعى قىزمەتى رەسمي تۇردە توقتاتىلعان بولاتىن. الايدا Report باسىلىمى بۇل باق-تىڭ شەكتەۋگە قاراماستان جۇمىسىن جالعاستىرعانىن جانە ونىڭ قىزمەتكەرلەرىنىڭ جۇمىسقا بارىپ جۇرگەنىن مالىمدەدى.
