فرانتسيادا سوڭعى كۇندەرى ورناعان اپتاپ ىستىق سالدارىنان «گولفەش» اتوم ەلەكتر ستانتسياسىندا ەلەكتر ەنەرگياسىن ءوندىرۋ ۋاقىتشا توقتاتىلدى، دەپ حابارلايدى "ادىرنا" ۇلتتىق پورتالى.
باق حابارلاۋىنشا، ستانتسياداعى قۋاتى 1,3 گيگاۆاتت بولاتىن ەكى رەاكتوردىڭ ءبىرى بۇعان دەيىن جوسپارلى پروفيلاكتيكاعا جابىلعان. ال ەكىنشى رەاكتور 23 ماۋسىمعا قاراعان ءتۇنى تابيعي شەكتەۋلەرگە بايلانىستى جۇمىسىن توقتاتقان.
مۇنداي شەشىمگە گاروننا وزەنىندەگى سۋ تەمپەراتۋراسىنىڭ كۇرت كوتەرىلۋى سەبەپ بولعان. اەس رەاكتورلارىن سالقىنداتۋ ءۇشىن پايدالانىلاتىن وزەن سۋىنىڭ تەمپەراتۋراسى بولجام بويىنشا 28 گرادۋس تسەلسيدەن اسۋى مۇمكىن. جەرگىلىكتى ەكولوگيالىق تالاپتارعا سايكەس، سالقىنداتۋدان كەيىن وزەنگە قايتارىلاتىن سۋدىڭ تەمپەراتۋراسى وسى كورسەتكىشتەن جوعارى بولماۋى ءتيىس.
فرانتسيانىڭ مەملەكەتتىك ەنەرگەتيكالىق كومپانياسى بۇعان دەيىن-اق ىستىق اۋا رايىنا بايلانىستى ەلدەگى بىرقاتار اتوم ەلەكتر ستانتسيالارىندا ەلەكتر ءوندىرىسى تومەندەۋى مۇمكىن ەكەنىن ەسكەرتكەن. كومپانيانىڭ مالىمەتىنشە، قازىرگى كەزدە اۋا رايىنىڭ اسەرىنەن ەنەرگيا ءوندىرۋ كولەمى جىل سايىن ورتا ەسەپپەن 0,3 پايىزعا ازايادى. الايدا كليماتتىڭ وزگەرۋىنە بايلانىستى بۇل كورسەتكىش الداعى جىلدارى ۇلعايۋى ىقتيمال.
سونىمەن قاتار فرانتسيانىڭ ۇلتتىق مەتەورولوگيالىق قىزمەتى ەلدىڭ كوپتەگەن وڭىرىندە ەڭ جوعارى – قىزىل دەڭگەيدەگى اۋا رايى قاۋپىن جاريالادى. اتاپ ايتقاندا، پاريجدە كولەڭكەدەگى اۋا تەمپەراتۋراسى 37,6 گرادۋسقا جەتىپ، 1947 جىلدان بەرگى ەڭ جوعارى كورسەتكىشتەردىڭ ءبىرى تىركەلدى.
الدىن الا مالىمەتتەر بويىنشا، اپتاپ ىستىق سالدارىنان ەلدە كەمىندە بەس ادام كوز جۇمعان، ونىڭ ىشىندە ەكى بالا بار. سونداي-اق سوڭعى تاۋلىكتە سۋ ايدىندارىندا 20-عا جۋىق ادامنىڭ قازا تاپقانى حابارلانىپ وتىر. ساراپشىلار بۇل وقيعالاردى دا ەكسترەمالدى ىستىقتىڭ سالدارىمەن بايلانىستىرىپ وتىر.
