قازاقستاندا اتوم ەلەكتر ستانتسياسىن (اەس) سالۋعا قارسى شىققان بەس بەلسەندىنىڭ جازاسى قىسقارتىلدى. دەگەنمەن، اپەللياتسيالىق سوت ولاردىڭ تولىق اقتالۋ تۋرالى ءوتىنىشىن قاناعاتتاندىرمادى. بۇل تۋرالى KazTAG اگەنتتىگى جازدى، دەپ حابارلايدى «ادىرنا».
الماتى قالالىق اپەللياتسيالىق سوتىنىڭ شەشىمىمەن نۇرلان تەمىرعاليەۆ، جانات قازاقباي، نۇرلان جاۋىلباەۆ، ايدار مۇباراكوۆ جانە فازىلجان سىدىقوۆتىڭ جازاسى ءتورت جىلدان ەكى جارىم جىلعا دەيىن جەڭىلدەتىلدى..
بەلسەندىلەر وزدەرىن كىنالى دەپ ساناماي، سوت ۇكىمىن ساياسي استارى بار دەپ اتاعان. ولار العاشقى سوت ۇكىمىنە شاعىم ءتۇسىرىپ، اقتاۋدى تالاپ ەتكەن ەدى.
الايدا سوت ولاردىڭ ۋاجدەرىن قابىلداماي، تەك جازا مەرزىمىن قىسقارتۋمەن شەكتەلدى. بەلسەندىلەردىڭ قورعاۋشىلارى بۇل شەشىممەن كەلىسپەيتىنىن ايتىپ، كاسساتسيالىق شاعىم تۇسىرەتىندەرىن مالىمدەدى.
بەلسەندىلەر بىلتىر اەس سالۋ تۋرالى رەفەرەندۋم قارساڭىندا ۇستالعان بولاتىن. تەرگەۋ نۇسقاسى بويىنشا، ولار اەس قۇرىلىسىنا قارسى پاراقشالار تاراتىپ، جينالىستار ۇيىمداستىرعان. پروكۋراتۋرا ولاردى «جاپپاي تارتىپسىزدىك ۇيىمداستىرۋعا دايىندالدى» دەپ ايىپتادى.
2024 جىلدىڭ تامىزىندا المالى اۋداندىق سوتى ولاردى ءتورت جىلعا بوستاندىعىن شەكتەۋ جازاسىنا كەسىپ، بەس جىل بويى قوعامدىق قىزمەتپەن اينالىسۋعا تىيىم سالعان.
بەلسەندىلەر بۇل ءىستى ساياسي قۋعىن دەپ باعالاعان.
وقيعا حالىقارالىق دەڭگەيدە دە نازار اۋدارتتى. Amnesty International ۇيىمى قازاقستانداعى ادام قۇقىقتارى جونىندەگى ەسەبىندە بۇل جاعدايدى اتاپ ءوتتى. ۇيىم مالىمەتىنشە، 2024 جىلدىڭ قازان ايىندا پوليتسيا اەس سالۋعا قارسى بەيبىت اكتسيا وتكىزۋدى جوسپارلاعان 12 بەلسەندىنى تۇتقىنداعان. ولارعا دا «جاپپاي تارتىپسىزدىككە دايىندالۋ» بابى بويىنشا ايىپ تاعىلعان.
