تۇركىستان قالاسىنداعى «كونگرەسس حولل» كوپسالالى كەشەنىندە مەملەكەتتىك قىزمەتشىلەر كۇنىنە ارنالعان سالتاناتتى ءىس-شارا ءوتتى.
مەرەكەلىك جيىنعا تۇركىستان وبلىسىنىڭ اكىمى نۇرالحان كوشەروۆ قاتىسىپ، مەملەكەتتىك قىزمەت سالاسىندا جەمىستى ەڭبەك ەتىپ جۇرگەن ازاماتتاردى كاسىبي مەرەكەمەن قۇتتىقتادى.
– سىزدەردى 23 ماۋسىم – مەملەكەتتىك قىزمەتشى كۇنىمەن شىن جۇرەكتەن قۇتتىقتايمىن! حالىققا ادال قىزمەت ەتۋ – ابىرويلى جانە ماڭىزدى مىندەت. پرەزيدەنتىمىز قاسىم-جومارت كەمەلۇلى توقاەۆ: ء«اربىر مەملەكەتتىك قىزمەتشى مەملەكەتشىل بولۋى كەرەك» دەپ اتاپ وتكەن بولاتىن. سوندىقتان وتان الدىنداعى انتىمىزعا ادال بولىپ، ەل سەنىمىن اقتاۋ – ارقايسىمىزعا جۇكتەلگەن ۇلكەن سەنىم مەن جاۋاپكەرشىلىك. قادىرلى ارىپتەستەر! بيىل تۇركىستان قالاسىنىڭ وبلىس ورتالىعى اتانعانىنا 8 جىل تولىپ وتىر. وسى قىسقا عانا ۋاقىت ىشىندە سىزدەردىڭ قاجىرلى ەڭبەكتەرىڭىزدىڭ ارقاسىندا تۇركىستان وبلىسى قارقىندى دامىدى. وڭىرىمىزدە 134 دەنساۋلىق ساقتاۋ نىسانى، 443 سپورت نىسانى، 185 مەكتەپ سالىندى. حالىقارالىق تالاپقا ساي سپورت، مادەنيەت جانە تۋريزم نىساندارى بوي كوتەردى. بۇگىندە وسى نىسانداردا الەمدىك دەڭگەيدەگى سپورتتىق جارىستار مەن مادەني ءىس-شارالار تۇراقتى تۇردە وتكىزىلىپ كەلەدى. جۋىردا عانا وبلىس ورتالىعىندا تۇركى مەملەكەتتەرى ۇيىمىنىڭ بەيرەسمي ءسامميتى ءوتتى. بەس ەلدىڭ پرەزيدەنتى ارنايى كەلىپ، تاريحي شاھارىمىز حالىقارالىق دەڭگەيدە تانىلدى. تۇركىستان الەم نازارىندا بولدى. پرەزيدەنت باستاماسىمەن ەرەكشە مارتەبەگە يە بولعان تۇركىستان 8 جىلدا ادام تانىماستاي وزگەردى. مەملەكەتتىك قولداۋلاردىڭ ناتيجەسىندە جالپى وڭىرلىك ءونىم كولەمى 3 ەسەگە ارتىپ، 5 تريلليون تەڭگەگە جەتتى. وبلىس حالقىنىڭ سانى 9 پايىزعا ءوسىپ، 2,1 ميلليون ادامنان استى. ال تۇركىستان قالاسىنىڭ حالقى 165 مىڭنان 242 مىڭعا جەتىپ، 40 پايىزعا كوبەيدى. وبلىسىمىز الەۋمەتتىك-ەكونوميكالىق دامۋ كورسەتكىشى بويىنشا رەسپۋبليكادا كوش باستاپ كەلەدى. بيىلعى بەس ايدىڭ قورىتىندىسى بويىنشا قىسقا مەرزىمدى ەكونوميكالىق ءوسىم 123,3 پايىزدى قۇراپ، ءوڭىرىمىز رەسپۋبليكا بويىنشا ءبىرىنشى ورىنعا شىقتى. بۇل – مەملەكەتتىك قىزمەتشىلەردىڭ كۇندىز-ءتۇنى اتقارعان جۇمىسى مەن ماڭداي تەرىنىڭ جەمىسى. وسى ادال ەڭبەكتەرىڭىز ءۇشىن بارشاڭىزعا شىنايى العىسىمدى ايتامىن. ءبىز وسى باعىتتاعى قارقىندى ءارى ناتيجەلى جۇمىستاردى جالعاستىرا بەرۋىمىز قاجەت. ءاليحان بوكەيحانوۆتىڭ «ۇلتقا قىزمەت ەتۋ بىلىمنەن ەمەس، مىنەزدەن» دەگەن اتالى ءسوزى بار. سوندىقتان ەل مۇددەسى جولىندا تاباندىلىق تانىتىپ، سەنىمدى اقتاۋعا مىندەتتىمىز. ءاردايىم حالىق ءۇشىن ادال قىزمەت ەتە بەرىڭىزدەر. سىزدەرگە زور دەنساۋلىق، وتباسىلارىڭىزعا اماندىق تىلەيمىن! ەلىمىز تىنىش، اسپانىمىز ءاردايىم اشىق بولسىن! – دەدى نۇرالحان كوشەروۆ.
مەرەكەلىك جيىندا ءوڭىردىڭ الەۋمەتتىك-ەكونوميكالىق دامۋىنا ۇلەس قوسىپ جۇرگەن مەملەكەتتىك قىزمەتشىلەر ماراپاتتالدى. وبلىس اكىمى بىرقاتار ازاماتقا مەملەكەتتىك جانە ۆەدومستۆولىق ناگرادالاردى، قۇرمەت گراموتالارى مەن العىس حاتتاردى تابىستادى. سونداي-اق تۇركىستان وبلىستىق ءماسليحاتىنىڭ توراعاسى نۇرالى ءابىشوۆ تە ءوز سالاسىندا ۇزدىك ناتيجەگە قول جەتكىزگەن قىزمەتكەرلەردى ماراپاتتادى.
ء ىس-شارا بارىسىندا تۇركىستان وبلىسىنىڭ ونەرپازدارى ونەر كورسەتىپ، مەرەكەلىك كوڭىل-كۇي سىيلادى.
ايتا كەتەيىك، بۇگىنگى تاڭدا وبلىسىمىزدا 520 مەكەمەدە 6 327 مەملەكەتتىك قىزمەتشى جۇمىس اتقارۋدا. ونىڭ 3 618-ءى جەرگىلىكتى اتقارۋشى ورگانداردىڭ قىزمەتكەرلەرى. وتكەن جىلى مەريتوكراتيا قاعيداسىمەن 262 مەملەكەتتىك قىزمەتشى جوعارىلادى. بۇل – ءبىلىم مەن تاجىريبەنىڭ، ەڭبەك پەن ىزدەنىستىڭ ناتيجەسى. مەملەكەت باسشىسىنىڭ ساياسي رەفورمالارىنىڭ ارقاسىندا باسقارۋ جۇيەسىنە جاڭا كوشباسشىلار كەلدى. 2021 جىلدان بەرى وڭىرىمىزدە 272 اۋىل اكىمى تىكەلەي حالىقتىڭ تاڭداۋىمەن سايلاندى. وڭىرلىك كادرلىق رەزەرۆكە 32 دارىندى جاس قابىلدانىپ، بۇگىندە ونىڭ 19-ى جاۋاپتى جۇمىسقا ورنالاستى.
