نيۋ-يورك قالاسىنىڭ جۇزدەگەن تۇرعىنى تايمس-سكۆەر الاڭىنا جينالىپ، اقش پەن ءيزرايلدىڭ يرانعا جاساعان شابۋىلىنا نارازىلىق ءبىلدىردى، دەپ حابارلايدى «ادىرنا» ءتىلشىسى.
اكتسياعا قاتىسۋشىلار يرانعا جاسالعان سوڭعى سوققىلاردى ايىپتاپ، قارجىنى ءبىلىم بەرۋ، باسپانا جانە باسقا دا ىشكى باسىم باعىتتارعا ءبولۋدى تالاپ ەتتى.
نارازىلار «Stop the War on Iran» («يرانعا قارسى سوعىستى توقتاتىڭدار»),«Trump Must Go Now» («ترامپ دەرەۋ كەتۋى ءتيىس») دەگەن جازۋلارى بار پلاكاتتاردى ۇستاپ شىقتى.
«قولدانۋعا دايىن 5 مىڭنان استام يادرولىق وقتۇمسىق اقش-تا بار ەكەنىن ۇمىتپاۋىمىز كەرەك. ءدال وسى اقش سول يادرولىق قارۋلاردى الەم بويىنشا ءسىز بەن ءبىز سياقتى قاراپايىم ادامدار تۇراتىن قالالار مەن ەلدى مەكەندەرگە باعىتتاپ وتىر»،- دەدى The People’s Forum ۇيىمىنىڭ ءبىلىم بەرۋ باعدارلامالارى جونىندەگى ديرەكتورى لايان فۋلەيحان.
ونىڭ ايتۋىنشا، يران اقش-قا قاۋىپ توندىرمەيدى.
«20 جىل بۇرىن ايتىلعان وتىرىككە قايتا سەنبەيمىز»، — دەدى فۋلەيحان ميتينگ بارىسىندا.
زەينەتكە شىققان ەكونوميكا جانە سىرتقى ساياسات ءپانىنىڭ وقىتۋشىسى مەريلين ۆوگت-داۋني اقش ۇكىمەتىن تاريحتاعى ەڭ اگرەسسيۆتى يمپەرياليستىك كۇش دەپ اتاپ، قازىرگى جاعدايدى كەزەكتى يمپەرياليستىك سوعىس دەپ باعالادى.
اكتسيا ۇيىمداستىرۋشىلارىنىڭ مالىمەتىنشە، الداعى كۇندەرى ءبىر عانا نيۋ-يورك قالاسىنىڭ وزىندە يرانعا قارسى سوعىسقا قارسى جاڭا نارازىلىق شارالارى جوسپارلانعان.
