22 ماۋسىم كۇنى الماتىداعى «ارمان» كينوتەاترىندا ء«ابىل» ءفيلمىنىڭ جابىق پرەمەرالىق كورسەتىلىمى وتەدى، دەپ حابارلايدى «ادىرنا» ءتىلشىسى قازتاگ-قا سىلتەمە جاساپ.
«دوستىق داڭعىلى، 104 مەكەنجايىندا ورنالاسقان «ارمان» كينوتەاترىنىڭ كوك زالىندا تولىقمەتراجدى كوركەم ءفيلمنىڭ قازاقستانداعى جابىق پرەمەراسى وتەدى»، – دەلىنگەن حابارلامادا.
قوناقتاردى قارسى الۋ ساعات 18:30-دا باستالادى. ال كينوسەانس 19:30-دا كورسەتىلمەك. فيلم قازاق تىلىندە ۇسىنىلادى.
بۇعان دەيىن قازاقستاندىق رەجيسسەر ەلزات ەسكەندىردىڭ ء«ابىل» ءفيلمى فرانتسيا كينوتەاترلارىندا كورسەتىلگەن ەدى.
ايتا كەتەيىك، فيلم كەڭەس وداعى قۇلاپ، كولحوز-سوۆحوز تاراپ، مال-مۇلىك بولىسكە ءتۇسىپ، ەلدە پريۆاتيزاتسيا ورىن العان كەزەڭدەگى قياناتقا ۇشىراعان قاراپايىم ادامدار مەن قاراۋسىز قالعان قازاق اۋىلىنداعى بەيبەرەكەتسىزدىكتى سۋرەتتەيدى. سول ارقىلى كينوتۋىندى تاۋەلسىزدىك باسىنداعى كۇردەلى ۋاقىت اياسىنداعى قازاق حالقىنىڭ رۋحاني كەيپىنە، پسيحولوگيالىق كۇيىنە الەۋمەتتىك تالداۋ جاسايدى. فيلمدە كەڭەستىك جۇيە كەزىندەگى ادام ءومىرىنىڭ قۇنسىزدىعى، قازاق حالقىنىڭ باستان كەشكەن جاعدايى، تۇرمىس قالپى، ءوز ەلىندە، ءوز جەرىندە ديسكريميناتسياعا تۇسكەندىگى، سوتسياليزمنەن كاپيتاليزمگە اۋىسۋ تۇسىنداعى ەكىۇداي سەزىم، سونىمەن قاتار جەمقورلىقتىڭ پايدا بولۋى جايلى دا وي قوزعايدى.
