22 mausym künı Almatydaǧy «Arman» kinoteatrynda «Äbıl» filmınıŋ jabyq premeralyq körsetılımı ötedı, dep habarlaidy «Adyrna» tılşısı QazTAG-qa sılteme jasap.
«Dostyq daŋǧyly, 104 mekenjaiynda ornalasqan «Arman» kinoteatrynyŋ kök zalynda tolyqmetrajdy körkem filmnıŋ Qazaqstandaǧy jabyq premerasy ötedı», – delıngen habarlamada.
Qonaqtardy qarsy alu saǧat 18:30-da bastalady. Al kinoseans 19:30-da körsetılmek. Film qazaq tılınde ūsynylady.
Būǧan deiın qazaqstandyq rejisser Elzat Eskendırdıŋ «Äbıl» filmı Fransiia kinoteatrlarynda körsetılgen edı.
Aita keteiık, film Keŋes odaǧy qūlap, kolhoz-sovhoz tarap, mal-mülık bölıske tüsıp, elde privatizasiia oryn alǧan kezeŋdegı qiianatqa ūşyraǧan qarapaiym adamdar men qarausyz qalǧan qazaq auylyndaǧy beibereketsızdıktı suretteidı. Sol arqyly kinotuyndy täuelsızdık basyndaǧy kürdelı uaqyt aiasyndaǧy qazaq halqynyŋ ruhani keipıne, psihologiialyq küiıne äleumettık taldau jasaidy. Filmde keŋestık jüie kezındegı adam ömırınıŋ qūnsyzdyǧy, qazaq halqynyŋ bastan keşken jaǧdaiy, tūrmys qalpy, öz elınde, öz jerınde diskriminasiiaǧa tüskendıgı, sosializmnen kapitalizmge auysu tūsyndaǧy ekıūdai sezım, sonymen qatar jemqorlyqtyŋ paida boluy jaily da oi qozǧaidy.
