الاكول جاعالاۋىندا تۋريستىك ماۋسىمنىڭ رەسمي اشىلۋىنا ارنالعان «الاكول الاۋلارى – 2026» فەستيۆالى ءوتتى.
ءىس-شاراعا وبلىس اكىمى بەرىك ءۋالي قاتىسىپ، تۇرعىندار مەن دەمالۋشىلاردى جاڭا ماۋسىمنىڭ باستالۋىمەن قۇتتىقتادى.
ايماق باسشىسى الاكولدىڭ تابيعي جانە تاريحي ماڭىزىنا توقتالىپ، كولدىڭ بۇگىندە وتاندىق جانە شەتەلدىك تۋريستەر ءۇشىن تارتىمدى دەمالىس ورنىنا اينالعانىن اتاپ ءوتتى. ونىڭ ايتۋىنشا، «الاكول الاۋلارى» فەستيۆالى العاش رەت ۇيىمداستىرىلىپ وتىر.
فەستيۆال اياسىندا قازاقستاننىڭ حالىق ءارتىسى سەكەن تۇرىسبەك، ءداستۇرلى ءانشى دىنيسلامبەك جايلاۋباي جانە ەسترادا جۇلدىزدارى دانا كەنتاي، ەركەش حاسەن، قاناي مەن زارينا وماروۆا ونەر كورسەتتى. مەرەكەلىك كەش وتشاشۋمەن اياقتالدى.
بەرىك ءۋاليدىڭ ايتۋىنشا، الاكول جاعالاۋىنداعى كونتسەرتتىك باعدارلامالار تامىز ايىنا دەيىن جالعاسىپ، ءار اپتا سايىن سارسەنبى جانە سەنبى كۇندەرى وتەدى.
تۋريستىك ماۋسىم قارساڭىندا جاعالاۋدا اباتتاندىرۋ جانە ينفراقۇرىلىمدى جاڭارتۋ جۇمىستارى جۇرگىزىلدى. دەمالۋشىلارعا قولايلى جاعداي جاساۋ ماقساتىندا 50-دەن استام سانيتارلىق توراپ، 35 دۋش كابيناسى، 110 كيىم اۋىستىرۋ ورنى، 100 قوقىس كونتەينەرى جانە 150 قوقىس جيناۋ كونتەينەرى ورناتىلدى.
تۋريستەردىڭ قاۋىپسىزدىگى ءۇشىن جاعالاۋعا ۇزىندىعى 5 شاقىرىم بولاتىن قورشاۋلار قويىلىپ، 224 بەينەباقىلاۋ كامەراسى ىسكە قوسىلدى. سوڭعى ەكى جىلدا 10 شاقىرىم كوشە جولىنا اسفالت توسەلدى. سونىمەن قاتار، بيىل ۇكىمەتتىڭ قولداۋىمەن ۇزىندىعى 72 شاقىرىم بولاتىن «كوكتال–الاكول» ەلەكتر جەلىسىنىڭ قۇرىلىسى باستالدى. جوبا وڭىردەگى ەلەكتر قۋاتى تاپشىلىعىن شەشۋگە باعىتتالعان.
