قازاقستان رەسپۋبليكاسى ءىىم ەلدە جۇرگىزىلۋى جوسپارلانعان قىلمىستىق جانە اكىمشىلىك امنيستياعا قانداي ساناتتاعى ازاماتتاردىڭ ىلىگۋى مۇمكىن ەكەنىن ءتۇسىندىردى، دەپ حابارلايدى "ادىرنا".
ۆەدومستۆونىڭ مالىمەتىنشە، مەملەكەت باسشىسىنىڭ باستاماسىمەن جاڭا كونستيتۋتسيانىڭ قابىلدانۋىنا بايلانىستى قىلمىستىق جانە اكىمشىلىك امنيستيا جۇرگىزۋ كوزدەلىپ وتىر. بۇل باستاما ادىلەتتىلىك، گۋمانيزم جانە ادام قادىر-قاسيەتىن قۇرمەتتەۋ قاعيداتتارىنا نەگىزدەلگەن قۇقىقتىق ساياساتتى ودان ءارى دامىتۋعا باعىتتالعان.
ءىىم اتاپ وتكەندەي، امنيستيا – قىلمىسقا جۇمساقتىق تانىتۋ ەمەس، قۇقىق بۇزۋشىلىق جاساعانىمەن قوعامعا ەلەۋلى قاۋىپ توندىرمەيتىن ازاماتتاردىڭ الەۋمەتتىك بەيىمدەلۋىنە مۇمكىندىك بەرەتىن ەرەكشە قۇقىقتىق تەتىك. ونىڭ ماقساتى – مۇنداي ادامداردىڭ قوعامعا، ەڭبەك نارىعىنا جانە ەكونوميكالىق ومىرگە قايتا بەيىمدەلۋىنە كەدەرگى كەلتىرەتىن قۇقىقتىق جانە قارجىلىق توسقاۋىلداردى ازايتۋ.
پرەزيدەنت تاپسىرماسىن ورىنداۋ اياسىندا ءماجىلىس دەپۋتاتتارى جەكەلەگەن ساناتتاعى قۇقىق بۇزۋشىلىقتار بويىنشا امنيستيا تۋرالى زاڭ جوباسىن ازىرلەدى. قۇجاتتى دايىنداۋ جانە تالقىلاۋ جۇمىستارىنا ىشكى ىستەر مينيسترلىگى باسقا مەملەكەتتىك ورگاندارمەن بىرلەسىپ قاتىسىپ جاتىر.
مينيسترلىكتىڭ تۇسىندىرۋىنشە، قىلمىستىق امنيستيا قىلمىستىق تەرىس قىلىقتار مەن ونشا اۋىر ەمەس قىلمىستار جاساعان ادامدارعا قولدانىلادى. سونىمەن قاتار اۋىرلىعى ورتاشا قىلمىستار ءۇشىن سوتتالعان ازاماتتار دا كەلتىرىلگەن زالال تولىق وتەلگەن نەمەسە مۇلدە زالال كەلتىرىلمەگەن جاعدايدا امنيستياعا ىلىگۋى مۇمكىن.
بۇدان بولەك، سوتتالعانداردىڭ جەكەلەگەن ساناتتارى ءۇشىن قىلمىستىڭ اۋىرلىعى مەن ولاردىڭ مىنەز-قۇلقىن ەسكەرە وتىرىپ، جازا مەرزىمىن قىسقارتۋ مۇمكىندىگى قاراستىرىلعان.
ءىىم مالىمەتىنشە، بۇل باستاما قىلمىستىق قانا ەمەس، اكىمشىلىك قۇقىق بۇزۋشىلىقتارعا دا قاتىستى بولادى. تاۋەلسىز قازاقستان تاريحىندا اكىمشىلىك امنيستيا العاش رەت وتكىزىلمەك.
ۆەدومستۆونىڭ پىكىرىنشە، ۇسىنىلىپ وتىرعان زاڭ جوباسى گۋمانيزم قاعيداتتارىن زاڭ ۇستەمدىگى جانە قۇقىقتىق ءتارتىپتى قامتاماسىز ەتۋ ساياساتىمەن ۇشتاستىرا وتىرىپ، مەملەكەتتىڭ قۇقىقتىق جۇيەسىن ودان ءارى جەتىلدىرۋگە باعىتتالعان.
