قىرعىزستاندا الەمدەگى العاشقى قۇم كەسكىندەمەسى اكادەمياسى اشىلدى، دەپ حابارلايدى «ادىرنا» ءتىلشىسى «كابارعا» سىلتەمە جاساپ.
ۇيىمنىڭ باس ديرەكتورى زارەما ابىلعازيەۆانىڭ سوزىنشە، بۇل — ءوڭىر ءۇشىن بىرەگەي جوبا ءارى اۋقىمدى شىعارماشىلىق پلاتفورما، وندا سيرەك كەزدەسەتىن انيماتسيا ءتۇرى كاسىبي دەڭگەيدە دامىتىلاتىن بولادى.
ء«بىزدىڭ كوپجىلدىق ەڭبەگىمىز ءوز جەمىسىن بەردى. ول جيناقتالعان تاجىريبەمىزدى جۇيەلەۋگە جانە الەمدە بالاماسى جوق بىرەگەي ۇيىمدى اشۋعا مۇمكىندىك بەردى. قۇممەن سۋرەت سالۋ – ونەردىڭ ەڭ كونە تۇرلەرىنىڭ ءبىرى بولعانىنا قاراماستان، ءبىز XXI عاسىردا العاش رەت «قۇم كەسكىندەمەسى» تەرمينىن رەسمي اينالىمعا ەنگىزىپ وتىرمىز»، – دەدى ول.
باسشى جوبا اياسىندا اكادەميا قۇممەن سۋرەت سالاتىن سۋرەتشىلەر مەن شەبەرلەردىڭ العاشقى دۇنيەجۇزىلىك سەزىن وتكىزۋدى جوسپارلاپ وتىرعانىن اتاپ ءوتتى. بۇل ءىس-شارا الەمنىڭ تۇكپىر-تۇكپىرىنەن كەلگەن وسى بەينەلەۋ ونەرى وكىلدەرىن بىرىكتىرمەك. سونىمەن قاتار اكادەميا اتاقتى نەمىس سۋرەتشىسى جانە دەكوراتورى بەندجامين زوبەلدىڭ قۇرمەتىنە وسى سالاداعى العاشقى الەمدىك ماراپات – زوبەل سىيلىعىن تاعايىنداماق. بۇگىندە بۇل اتاققا ءتۇرلى ەلدەردەن 30 شەبەر ۇمىتكەر بولىپ وتىر. قۇزىرەتتى قازىلار القاسىنىڭ شەشىمىمەن ولاردىڭ التاۋى ءوز باعىتتارى بويىنشا چەمپيون اتانباق. سىيلىق قۇم كەسكىندەمە اپتالىعى فەستيۆالىندە تابىستالادى.
بۇدان بولەك، جىلدىڭ ماڭىزدى وقيعالارىنىڭ ءبىرى – 14–20 قىركۇيەك ارالىعىندا چولپون-اتا قالاسىندا وتەتىن Sand art EXPO حالىقارالىق كورمەسى بولماق. اتالعان الاڭدا سۋرەتشىلەر، فەستيۆال ۇيىمداستىرۋشىلارى جانە يندۋستريانىڭ جەتەكشى ساراپشىلارى باس قوسادى.
