قىرعىزستان مۇقك-ءنىڭ بۇرىنعى باسشىسى قامشىبەك تاشيەۆ لاۋازىمىنان بوساتىلعاننان كەيىن العاش رەت كوپشىلىك الدىنا شىقتى. ول باسپاناعا مۇقتاج وتباسىعا جاڭا ءۇيدى تابىستاۋ راسىمىنە قاتىستى، دەپ حابارلايدى «ادىرنا» ءتىلشىسى 24.kg-گە سىلتەمە جاساپ.
ءىس-شارادان تۇسىرىلگەن ۆيدەو ونىڭ جاقتاستارى تاراپىنان جاريالاندى. قامشىبەك تاشيەۆ جاڭا ءۇيدىڭ كىلتىن ءۇي يەلەرىنە جەكە ءوزى تابىستادى.
ء«ار ادامنىڭ ءوز باسپاناسى بولۋى ءتيىس. پرەزيدەنت سادىر جاپاروۆ ازاماتتاردىڭ تۇرعىن ءۇي ماسەلەسىن شەشۋگە باعىتتالعان ساياسات جۇرگىزىپ وتىر. وش پەن قارا-سۋ قالالارىندا يپوتەكالىق ۇيلەردىڭ قالاي بەرىلگەنىن وزدەرىڭىز كوردىڭىزدەر. مىڭداعان وتباسى ءوز باسپاناسىنا يە بولۋعا مۇمكىندىك الدى. ءاربىر مۇقتاج وتباسىنىڭ باسىندا باسپانا بولۋى كەرەك»، — دەدى ول.
ءىس-شاراعا قاتىسۋشىلاردىڭ ايتۋىنشا، ءۇي قۇرىلىسى قيىن ومىرلىك جاعدايعا تاپ بولعان وتباسىعا قايىرىمدىلىق كومەك رەتىندە ۇيىمداستىرىلعان.
ەسكە سالايىق، تاشيەۆ مەملەكەتتىك قىزمەتتەرىنەن كەتكەننەن كەيىن «75-ءتىڭ حاتى» ءىسى بويىنشا فيگۋرانت بولدى. بۇرىنعى باسشى بيلىكتى كۇشپەن باسىپ الۋعا دايىندالدى جانە قىزمەتتىك وكىلەتتىگىن اسىرا پايدالاندى دەگەن ايىپپەن كۇدىككە ىلىنگەن. سوت پروتسەسى جالعاسىپ جاتىر.
