قىتايدىڭ سولتۇستىك-باتىسىنداعى تسينحاي پروۆينتسياسىندا ماگنيتۋداسى 6,3 بولاتىن جەر سىلكىنىسى بولىپ، سالدارىنان ءبىر ادام قازا تاپتى، دەپ حابارلايدى "ادىرنا" ۇلتتىق پورتالى.
جەر سىلكىنىسى بەيجىڭ ۋاقىتىمەن ساعات 17:06-دا حايسي موڭعول-تيبەت اۆتونوميالىق پرەفەكتۋراسىندا تىركەلگەن. قىتاي سەيسمولوگتارىنىڭ مالىمەتىنشە، ءزىلزالانىڭ ەپيتسەنترى سولتۇستىك ەندىكتىڭ 37,80 گرادۋسى مەن شىعىس بويلىقتىڭ 95,56 گرادۋسىندا ورنالاسقان، ال وشاعى شامامەن 10 شاقىرىم تەرەڭدىكتە بولعان. ءبىر ادام قازا تاۋىپ، ءتورت ادام جاراقاتتانعان.
وقيعادان كەيىن تسينحاي پروۆينتسياسىنىڭ سەيسمولوگيالىق بيۋروسى اپات ايماعىنا ارنايى جۇمىس توبىن جىبەرىپ، جەرگىلىكتى بيلىكپەن بىرلەسىپ قۇتقارۋ جانە زارداپتاردى باعالاۋ جۇمىستارىن باستادى. سونىمەن قاتار، پروۆينتسيالىق توتەنشە جاعدايلار دەپارتامەنتى جەر سىلكىنىسىنە بايلانىستى II دەڭگەيلى جەدەل ارەكەت ەتۋ رەجيمىن ەنگىزدى.
قازىرگى ۋاقىتتا ايماقتا ىزدەستىرۋ-قۇتقارۋ جۇمىستارى جالعاسىپ جاتىر. بيلىك وكىلدەرى تۇرعىنداردى ساقتىق شارالارىن ساقتاۋعا جانە رەسمي اقپارات كوزدەرىنىڭ حابارلامالارىن قاداعالاپ وتىرۋعا شاقىردى.
