قازاقستاندىق قۇتقارۋشىلار توبى جەتكەن اۋعانستاندا تاعى دا جويقىن جەراستى دۇمپۋلەرى تىركەلدى، - دەپ حابارلايدى "ادىرنا" پورتالى Tengrinews.kz-كە سىلتەپ.
تاعى ءبىر جەر سىلكىنىسى 11 قازان كۇنى تاڭەرتەڭ جەرگىلىكتى ۋاقىت بويىنشا 05:15 شاماسىندا (استانا ۋاقىتى بويىنشا 06:40) ەلدىڭ باتىسىنداعى گەرات قالاسىنىڭ ماڭىندا بولدى. ءبىرىنشى دۇمپۋدەن كەيىن بىرنەشە ايتارلىقتاي بايقالاتىن افتەر دۇمپۋلەر بولدى.
بۇل ۋاقىتتا قازاقستاندىق قۇتقارۋشىلار جەر سىلكىنىسىنەن ەڭ قاتتى زارداپ شەككەن گەراتتان 60 شاقىرىم جەردەگى نوفەرافي اۋىلىنا جەتىپ ۇلگەردى. جەدەل-قۇتقارۋ جاساعىنىڭ قىزمەتكەرلەرى ءتۇننىڭ ءبىر ۋاعىنا دەيىن شاتىرلى قالاشىق قۇردى.
تاڭەرتەڭ ولاردى قاتتى جەر سىلكىنىسى تاڭ قالدىردى. ادامدار شاتىرلار مەن كولىكتەردەن قاشتى. قۋانىشقا وراي، ەشكىم زارداپ شەككەن جوق.
ايتا كەتەيىك، جەر استى دۇمپۋلەرى ءالى دە جالعاسىپ جاتىر. سوڭعى بايقالعان جەر سىلكىنىسىنىڭ سالدارىنان 5-10 شاقىرىم جەردە ورنالاسقان كورشى اۋىل قيراپ قالعان بولاتىن. زەرتتەۋلەر بويىنشا جەر سىلكىنىسىنىڭ وشاعى ودان الىس ەمەس بولسا كەرەك.
ەستەرىڭىزگە سالساق، اۋعانستاندا 7 قازاندا كۇشتى جەر سىلكىنىسى بولدى. قازا تاپقاندار سانى ەكى مىڭنان استى. بۇدان كەيىن مەملەكەت باسشىسى قاسىم-جومارت توقاەۆ اۋعانستانعا گۋمانيتارلىق كومەك كورسەتۋدى تاپسىردى.
