Ұжымдық қауіпсіздік туралы шарт ұйымына (ҰҚШҰ) мүше мемлекеттер Арменияның мүшелік жарналарды төлемеуіне байланысты оған санкция қолдану мәселесін қарастыруға келісті. Бұл туралы 10 маусымда ҰҚШҰ Сыртқы істер министрлері кеңесінің отырысынан кейін өткен баспасөз мәслихатында Ресейдің сыртқы істер министрі Сергей Лавров мәлімдеді, деп хабарлайды «Адырна» тілшісі.
Лавровтың айтуынша, Арменияға ҰҚШҰ жарғысының тиісті бабы қолданылуы мүмкін, өйткені ел екі жылдан бері мүшелік жарналарын төлемеген.
Әңгіме ҰҚШҰ жарғысының 25-бабы туралы болып отыр. Бұл бапқа сәйкес, егер мүше мемлекет ұйым бюджеті алдындағы қарызын екі жыл бойы өтемесе, кеңес оның азаматтарын ҰҚШҰ құрылымдарындағы квоталық лауазымдарға ұсыну құқығын тоқтата алады. Сондай-ақ қарызы толық өтелгенге дейін мұндай мемлекет ұйым органдарында дауыс беру құқығынан айырылуы мүмкін.
Алайда мүшелік жарналарды төлемеу ұйымнан автоматты түрде шығарылуды білдірмейді. Мемлекеттің ҰҚШҰ қызметіне қатысуын тоқтату немесе ұйымнан шығару мәселесі жарғының 20-бабымен реттеледі. Онда ел жарғы талаптарын, кеңес шешімдерін және ҰҚШҰ органдары қабылдаған өзге де шешімдерді орындамаса, оның ұйым қызметіне қатысуы тоқтатылуы мүмкін екені көрсетілген. Міндеттемелердің орындалмауы жалғасқан жағдайда, кеңес мемлекетті ұйымнан шығару туралы шешім қабылдай алады.
Армения ҰҚШҰ-ға мүшелік жарна төлеуден 2024 жылы ашық түрде бас тартқан және осы ұстанымын әлі күнге дейін өзгерткен жоқ. Ереван мұны ұйым жұмысына іс жүзінде қатыспайтынымен түсіндіреді.
Армения мен ҰҚШҰ арасындағы қатынастар Ереван ұйымды ел қауіпсіздігіне қатысты дағдарыстар кезінде әрекетсіздік танытты деп айыптағаннан кейін нашарлай түсті.
ҰҚШҰ – 1992 жылғы Ұжымдық қауіпсіздік туралы шарт негізінде құрылған әскери-саяси ұйым. Қазіргі таңда оған Қазақстан, Армения, Беларусь, Қырғызстан, Ресей және Тәжікстан мүше.
