«قازاۆتوجول» ۇلتتىق كومپانياسى تاعى ەۋروپالىق قايتا قۇرۋ جانە دامۋ بانكىنەن (ەقدب) نەسيە الماق. بۇل تۋرالى حالىقارالىق قارجى ينستيتۋىنىڭ سايتىندا جازىلعان، دەپ حابارلايدى ”ادىرنا” ۇلتتىق پورتالى kursiv.kz سايتىنا سىلتەپ.
سايتتا جازىلعان مالىمەتكە سايكەس، بانك ۇلتتىق كومپانياعا 232,6 ملرد تەڭگە كولەمىندە قارجى بەرمەك. بۇل قاراجات جوبالىق جانە قۇرىلىس جۇمىستارىنا جۇمسالادى، سونداي-اق اقتوبە-ۇلعايسىن جولىنىڭ 234 شاقىرىمىن قايتا جوندەۋدەن وتكىزەدى.
ازىرگە نەسيە بەرۋ تۋرالى جوبا قارالىپ جاتىر، 7 مامىردا بەكىتىلۋى كەرەك. ەقدب-مەن قاتار ازيالىق ينفراقۇرىلىمدىق ينۆەستيتسيا بانكى دە قارجىلاندىرۋ بولەدى.
جوسپار بويىنشا، اقتوبە-ۇلعايسىن اۆتوجولى ەكى جولاقتان ءتورت جولاققا دەيىن كەڭەيۋى كەرەك. جالپى جوبانىڭ قۇنىن 1 ملرد ەۋرو دەپ باعالاپ وتىر. نەگىزگى ءتورت اۋماققا بولىنگەن. اقتوبە-اجار (28 شاقىرىم), اقجار-حرومتاۋ (28 شاقىرىم، قۇرىلىس كەزەڭىندە), حرومتاۋ-بەلقوپا (108 شاقىرىم) جانە بەلقوپا-ۇلعايسىن (98 شاقىرىم).
Inbusiness ەسەپتەۋىنشە, بۇل جوبا «قازاۆتوجول» مەن ەۋروپالىق بانك اراسىنداعى التىنشى نەسيەلىك كەلىسىم. بۇعان دەيىن 2024 جىلى «قازاۆتوجول» دۇنيەجۇزىلىك بانك پەن ازيالىق ينفراقۇرىلىمدىق ينۆەستيتسيالار بانكىنەن 1,3 ملرد دوللار ينۆەستيتسيا تارتقان. ول قاراجات قاراعاندى-جەزقازعان اۆتوجولىنىڭ جوندەۋ جۇمىستارى ءۇشىن الىنعان. ال وتكەن جىلى كۇزدە «قازاۆتوجول» ازيالىق دامۋ بانكىنەن قىزىلوردا-جەزقازعان اۆتوماگيسترالىن قالپىنا كەلتىرۋ ءۇشىن 291,5 ملن دوللار الادى دەپ حابارلانعان ەدى.
كومپانيانىڭ قارجى ەسەبىنە سۇيەنەتىن بولساق، 2024 جىلدىڭ ءبىرىنشى جارتىجىلدىعىندا «قازاۆتوجولدىڭ» ەقدب الدىندا 180 ملرد تەڭگە، ازيالىق دامۋ بانكى الدىندا 64 ملرد تەڭگە، قىتاي ەكسيمبانكى 723 ملرد تەڭگە جانە ەۋرازيالىق دامۋ بانكى الدىندا 47 ملرد تەڭگە ۇزاق مەرزىمدى كرەديتى بولعان. بۇل قارىزدىڭ باسىم بولىگىن 2034-2039 جىلدار ارالىعىندا تولەۋى قاجەت.
«قازاۆتوجولدىڭ» اقىلى جولداردان تابىس تاباتىنىن دا ەسكەرۋ كەرەك. 2024 جىلى ودان تۇسكەن كىرىس 399 ملن تەڭگەنى قۇراپ، تازا پايدا 32%-عا ارتقان. بىراق شىعىن دا از ەمەس. بىلتىر جول ينفراقۇرىلىمىن جاڭالاۋعا، جوندەۋ جۇمىستارىنا جانە جول تەحنيكاسىن ساتىپ الۋعا 47,4 ملرد تەڭگە بولىنگەن.
