Мәжіліс отырысында Жоғары аудиторлық палатаның есебінен кейін депутат Азат Перуашев Қазақстанның сыртқы қарызы рекордтық деңгейге жеткенін мәлімдеді, деп хабарлайды «Адырна» тілшісі.
«Жыл сайын жаңа қарыздардың 36%-ы бұрын алынған міндеттемелер бойынша ескі қарызды өтеуге жұмсалып келеді, яғни «қарызды жаңа қарызбен жабу» қағидасы жұмыс істейді. 2025 жылы мұндай қайта қаржыландыру көлемі 51%-ға дейін өсті», – деді депутат Азат Перуашев.
Оның айтуынша, Ұлттық банктің деректеріне сәйкес, 2025 жылдың соңына қарай Қазақстанның сыртқы қарызы рекордтық көрсеткішке – шамамен 182 млрд АҚШ долларына жеткен.
«Жыл ішінде сыртқы қарыз көлемі 10,4%-ға артты. Бұл – соңғы 17 жылдағы ең жоғары өсім», – деп хабарлады депутат.
Еске сала кетейік, 2024 жылы Қазақстанның сыртқы қарызы 164,7 млрд долларды құраған болатын. Бұл көрсеткіш Еуразиялық экономикалық одақ елдері ішінде ең жоғары деңгей болған.
