«اق جول» دەموكراتيالىق پارتياسىنىڭ توراعاسى ازات پەرۋاشەۆ پارتيانىڭ كەزەكتى سەزى بارىسىندا ءوز وكىلەتتىگىن توقتاتۋ تۋرالى شەشىم قابىلداعانىن مالىمدەدى، دەپ حابارلايدى "ادىرنا" ۇلتتىق پورتالى.
ساياساتكەردىڭ ايتۋىنشا، بۇل قادام پارتيا باسشىلىعىن جاڭارتۋ جانە ۇيىم ىشىندە مونوپوليانىڭ قالىپتاسۋىنا جول بەرمەۋ ماقساتىندا جاسالىپ وتىر.
ء«بىز قازىردىڭ وزىندە قوعامداعى وزگەرىستەر لەگىندە ءومىر ءسۇرىپ جاتىرمىز. الايدا مونوپوليا جاڭا باستامالار مەن تىڭ يدەيالاردىڭ دامۋىنا كەدەرگى كەلتىرۋى مۇمكىن. سوندىقتان پارتيانىڭ جاڭارۋىنا مۇمكىندىك بەرۋ ءۇشىن توراعا قىزمەتىنەن كەتۋ تۋرالى شەشىم قابىلدادىم»، – دەدى ازات پەرۋاشەۆ.
پارتيا سەزىندە ول توراعالىققا قازاقستان رەسپۋبليكاسى پارلامەنتى ءماجىلىسىنىڭ دەپۋتاتى دانيا ەسپاەۆانىڭ كانديداتۋراسىن ۇسىندى. پەرۋاشەۆ ونىڭ كاسىبي تاجىريبەسى، زياتكەرلىك الەۋەتى جانە باتىل شەشىم قابىلداي ءبىلۋ قابىلەتى پارتيانىڭ ودان ءارى دامۋىنا سەرپىن بەرەدى دەگەن سەنىم ءبىلدىردى.
«ونىڭ تالانتى، اقىل-پاراساتى جانە جاڭاشىل كوزقاراسى پارتيا جۇمىسىنا جاڭا سەرپىن بەرىپ، وڭ وزگەرىستەر اكەلەدى دەپ سەنەمىن»، – دەدى ول.
«اق جول» دەموكراتيالىق پارتياسىنىڭ كەزەكتەن تىس سەزىندە پارتيانىڭ جاڭا توراعاسى بولىپ ءماجىلىس توراعاسىنىڭ ورىنباسارى، «اق جول» فراكتسياسىنىڭ مۇشەسى دانيا ەسپاەۆا سايلاندى. ول 2016 جىلدىڭ ناۋرىز ايىنان بەرى «اق جول» پارتياسىنان ءماجىلىس دەپۋتاتى بولىپ كەلەدى. ال 2023 جىلدىڭ ناۋرىزىنان باستاپ ءماجىلىس توراعاسىنىڭ ورىنباسارى قىزمەتىن اتقارعان.
ايتا كەتەيىك، 2002 جىلدىڭ 3 ساۋىرىندە "اق جول" پارتياسى ادىلەت ورگاندارىنا رەسمي تۇردە تىركەلگەن. العاشقىدا «اق جول» قازاقستان دەموكراتيالىق پارتياسى قوعامدىق بىرلەستىگىنىڭ تەڭ توراعالارى بولىپ بولات ءابىلوۆ، ءاليحان بايمەنوۆ، وراز جاندوسوۆتار سايلاندى. ال 2003 جىلى تەڭ توراعالار قاتارىنا ليۋدميلا جۋلانوۆا مەن التىنبەك سارسەنبايۇلى قوسىلدى. 2005 جىلى پارتيا قۇرىلتايىندا تەڭ توراعالار ينستيتۋتى تاراتىلىپ، پارتيا توراعالىعى ءاليحان بايمەنوۆكە بەرىلدى.
ال 2011 جىلى «اق جول» پارتياسىنىڭ توراعاسى بولىپ ءبىراۋىزدان سول كەزدەگى «اتامەكەن» پالاتاسىنىڭ باسشىسى ازات پەرۋاشەۆ سايلانعان ەدى.
2019 جىلى نۇرسۇلتان نازارباەۆ پرەزيدەنتتىكتەن كەتكەندە كوزىنە جاس الىپ، ەل نازارىن اۋدارعان پەرۋاشەۆ ودان كەيىن دە ءوزىنىڭ ەرەكشە مالىمدەمەلەرىمەن تانىلعان. تاياۋدا عانا ول بۇعان دەيىن قازاقستاندى «شترافستان» دەپ اتاعان مالىمدەمەسىنە قاتىستى تۇسىنىك بەرگەن.
«وتكەن جىلى وسىنداي مالىمدەمە جاساعان كەزدە مەن بۇل ءسوزدىڭ قاتە ەكەنىن مويىندادىم. پارلامەنتاريلەر ءسوزدى ابايلاپ ءارى سالماقتاپ ايتۋى ءتيىس. مەن مۇنى ءبىر جىل بۇرىن ايتقانمىن. كەشە پرەزيدەنت تەك مەنى عانا ەمەس، باسقا ادامداردى دا سىنعا الدى. بۇل – جۇمىس، بۇل – ءومىر. ءبىز مەملەكەت باسشىسىنىڭ سىنىن قابىلداپ، ودان ساباق الىپ، ءارى قاراي جۇمىس ىستەۋىمىز كەرەك»، - دەگەن پەرۋاشەۆ.
سونداي-اق ول قازاقستاننىڭ «شترافستان» ەمەس ەكەندىگىن اتاپ ءوتتى.
ء«بىزدىڭ ەلىمىز – قازاقستان، ول «شترافستان» ەمەس. ءبىز – وركەنيەتتى مەملەكەتپىز»، – دەپ قوسقان دەپۋتات.
پەرۋاشەۆ بۇعان دەيىن كاسىپكەرلەرگە سالىناتىن شامادان تىس ۇلكەن ايىپپۇلداردى سىناۋ بارىسىندا قازاقستاندى «شترافستان» دەپ اتاعان ەدى.
2 ماۋسىمدا پرەزيدەنت قاسىم-جومارت توقاەۆ الاتاۋ قالاسىن دامىتۋ جونىندەگى كەڭەستە «شترافستان، ايىپپۇلستان» دەگەندەردى سىنعا العان بولاتىن.
