8 ماۋسىمدا گرۋزيانىڭ ىشكى ىستەر مينيسترلىگى ەلدىڭ كوشى-قون زاڭناماسىنا وزگەرىستەر ەنگىزۋ جونىندەگى زاڭ جوباسىن ازىرلەگەنىن مالىمدەدى، دەپ حابارلايدى «ادىرنا» ءتىلشىسى.
ەگەر بۇل تۇزەتۋلەر قابىلدانسا، شەتەلدىك ستۋدەنتتەر مەن گرۋزيا ازاماتتارىنىڭ جۇبايلارى ءۇشىن تۇرۋ ىقتيارحاتىن الۋ تالاپتارى ەداۋىر قاتاڭدايدى. اتاپ ايتقاندا، گرۋزين جوعارى وقۋ ورىندارىنا تۇسەتىن شەتەل ازاماتتارىنان مەملەكەتتىك نەمەسە وقۋ ءتىلىن مەڭگەرگەنىن راستايتىن قۇجات تالاپ ەتۋ ۇسىنىلىپ وتىر. سونىمەن قاتار ءبىلىم بەرۋ مەكەمەلەرىنە شەتەلدىك ستۋدەنتتەردى قابىلداۋ بويىنشا كۆوتا بەلگىلەۋ جوسپارلانعان.
وقۋ ماقساتىنداعى ىقتيارحات تەك كامەلەتكە تولعان ازاماتتارعا جانە اككرەديتتەلگەن وقۋ ورنىنا تۇسكەن جاعدايدا عانا بەرىلمەك. مۇنداي رۇقسات اكادەميالىق ۇلگەرىمنىڭ تومەندىگى، ەڭبەك قىزمەتى تالاپتارىنىڭ بۇزىلۋى نەمەسە بەلگىلى ءبىر ۋاقىت ارالىعىندا گرۋزيا اۋماعىندا بولماۋى سەبەپتى كۇشىن جويۋى مۇمكىن.
سونداي-اق گرۋزيا ازاماتتارىنىڭ شەتەلدىك جۇبايلارى ءۇشىن ىقتيارحاتتىڭ جەكە ءتۇرىن ەنگىزۋ ۇسىنىلعان. ونى بەرمەس بۇرىن ارنايى كوميسسيا نەكەنىڭ شىنايىلىعىن تەكسەرەدى. ازاماتتىق نەمەسە ىقتيارحات الۋ ماقساتىندا جاسالعان جالعان نەكە قىلمىستىق جاۋاپكەرشىلىككە جاتقىزىلۋى مۇمكىن. مۇنداي جاعدايدا ادام ەلدەن شىعارىلىپ، گرۋزياعا 2 جىلدان 10 جىلعا دەيىن كىرۋگە تىيىم سالىنۋى ىقتيمال. بۇدان بولەك، ايىپپۇل سالۋ، ەكى جىلعا دەيىن ۇيقاماققا الۋ نەمەسە ەكى جىلعا دەيىن باس بوستاندىعىنان ايىرۋ جازاسى قاراستىرىلعان.
تۇزەتۋلەردە سونداي-اق ءىىم-ءنىڭ كوشى-قون دەپارتامەنتىنە جەدەل-ىزدەستىرۋ شارالارىن جۇرگىزۋ قۇقىعىن بەرۋ كوزدەلگەن. كوشى-قون ىستەرىن سوتتا قاراۋ جانە شاعىمدانۋ مەرزىمدەرىن قىسقارتۋ، ال كەيبىر جاعدايلاردا ىستەردى اۋىزشا تىڭداۋسىز قاراۋ ۇسىنىلعان.
2025 جىلدىڭ قازان ايىنان باستاپ گرۋزيا بۇعان دەيىن ايتارلىقتاي ليبەرالدى بولعان كوشى-قون ساياساتىن بىرتىندەپ قاتاڭداتا باستادى. ال 1 ناۋرىزدان باستاپ ەلدە ميگرانتتاردى جۇمىسقا ورنالاستىرۋ ەرەجەلەرى وزگەردى. ەندى ەڭبەك كەلىسىمشارتىن جاساۋ ءۇشىن جۇمىس ۆيزاسى (D1) نەمەسە تۇرۋ ىقتيارحاتى قاجەت.
گرۋزيادا جەكە كاسىپكەر رەتىندە تىركەلگەن شەتەل ازاماتتارى قاشىقتان قىزمەت كورسەتسە دە، جۇمىس ىستەۋگە رۇقسات الۋعا مىندەتتى. بۇل ساناتقا، مىسالى، رەسەيدەن كوشىپ كەلگەندەردىڭ اراسىندا كوپ كەزدەسەتىن IT-ماماندار كىرەدى.
ستاتيستيكاعا سايكەس، 2024 جىلى گرۋزيادا تۇراقتى نەگىزدە 250 مىڭ شەتەلدىك تۇرعان. بۇل ەل حالقىنىڭ 6,6 پايىزىن قۇرايدى. كورسەتكىش ون جىل بۇرىنعىدان ون ەسە جوعارى. شەتەلدىكتەر سانىنىڭ وسۋىنە رەسەيدىڭ ۋكرايناعا قارسى تولىق اۋقىمدى سوعىسى اسەر ەتىپ، سوعىستان كەيىن گرۋزياعا رەسەيدەن كەلگەن مىڭداعان رەلوكانت پەن ۋكراينادان بوسقىندار قونىس اۋدارعان.
گرۋزيانىڭ پرەمەر-ءمينيسترى يراكلي كوباحيدزە كوشى-قون ماسەلەسى ەۋروپاداعى ۇدەرىستەر اياسىندا گرۋزين قوعامىن ەرەكشە الاڭداتاتىنىن ايتتى.
«ەۋروپالىق وداقتىڭ كەيبىر ەلدەرىندە ميگرانتتاردىڭ ۇلەسى قالاي ءوسىپ جاتقانىن كورىپ وتىرسىزدار. سوندىقتان ءاربىر گرۋزين پاتريوتى گرۋزيانىڭ ۇلتتىق جانە ءدىني بىرەگەيلىگىن بەرىك قورعاپ، ساقتاپ قالۋىن قالايدى»، – دەدى ۇكىمەت باسشىسى 13 اقپاندا.
