Freedom Finance پەن «قازتاگ» اگەنتتىگى اراسىنداعى قىلمىستىق ءىس قوعامدىق تالقىلاۋدىڭ وزەگىنە اينالىپ وتىر. وسىعان بايلانىستى جۋرناليست المات ءابدىرامان الەۋمەتتىك جەلىدەگى جازباسىندا ماسەلەنى تەك ەكى تاراپ اراسىنداعى جانجال رەتىندە ەمەس، جالپى قازاقستاندىق جۋرناليستيكانىڭ كاسىبي ستاندارتتارى مەن اقپاراتتىق جاۋاپكەرشىلىگى تۇرعىسىنان قاراستىرۋ قاجەتتىگىن ايتتى.
«اقيقاتىندا، ءجۋرناليستىڭ كاسىبي جاۋاپكەرشىلىگى مەن ءسوز بوستاندىعى ءبىر-بىرىنە قارسى ۇعىمدار ەمەس قوي. قايتا، جاۋاپكەرشىلىك بولعان جەردە عانا ءسوز بوستاندىعىنىڭ بەدەلى بەكەمدەلەدى. جۋرناليست جىبەرگەن كىلتيپان كىنارات نەمەسە جالعان اقپارات فاكتىسى انىقتالسا، ونى مويىنداۋ السىزدىكتەن گورى، كاسىبيلىكتىڭ بەلگىسى»، – دەپ اتاپ ءوتتى المات ءابدىرامان.
جۋرناليست Freedom Finance جاريالاعان رەسمي ۇستانىمعا دا نازار اۋدارىپ، كومپانيانىڭ نەگىزگى ماقساتى ماتەريالدىق وتەماقى ءوندىرۋ ەمەس، ىسكەرلىك بەدەلىن قورعاۋ ەكەنىن اتاپ ءوتتى. سونداي-اق، كومپانيا داۋدى مەدياتسيا ارقىلى شەشۋگە دايىن ەكەنىن بىرنەشە رەت مالىمدەگەنىن ەسكە سالدى.
جۋرناليست ءامىر قاسەنوۆكە قاتىستى قوزعالعان قىلمىستىق ءىس توڭىرەگىندەگى پىكىرتالاستاردا قوعام اقپاراتتىڭ شىنايىلىعى ماسەلەسىن دە نازاردان تىس قالدىرماۋى كەرەك دەپ سانايدى.
جۋرناليستيكا سالاسىندا 26 جىلدىق تاجىريبەسى بار المات ءابدىرامان سوڭعى ۋاقىتتا مەديا كەڭىستىكتە الاڭداۋشىلىق تۋدىراتىن ۇردىستەر بايقالىپ وتىرعانىن ايتتى. ونىڭ پىكىرىنشە، كەي جاعدايدا تەكسەرىلمەگەن نەمەسە داۋلى اقپارات كەڭىنەن تارالىپ، كەيىن ولاردىڭ شىنايىلىعىنا قاتىستى سۇراقتار تۋىنداعاندا قوعامدىق تالقىلاۋ اقپاراتتىڭ ناقتىلىعى ماسەلەسىنەن گورى ءسوز بوستاندىعىنا قىسىم كورسەتۋ تاقىرىبىنا ادەيى اۋىستىرىلىپ جىبەرىلەدى.
اۆتور مۇنداي جاعدايدا اقپاراتتىڭ شىنايىلىعى مەن قۇقىقتىق جاۋاپكەرشىلىك ماسەلەلەرى ەكىنشى كەزەككە ىسىرىلىپ قالۋى مۇمكىن ەكەنىن اتاپ ءوتتى. ونىڭ ايتۋىنشا، اقپاراتتىڭ راس-وتىرىگىن انىقتاۋعا باعىتتالعان كاسىبي تالقىلاۋدىڭ ەموتسيالىق جانە ساياسي رەڭكى باسىم پىكىرتالاسقا ۇلاسۋى جۋرناليستيكا ينستيتۋتىنا دەگەن قوعامدىق سەنىمگە كەرى اسەر ەتەدى.
«مۇنداي ۇردىستەر ءسوز بوستاندىعى ءۇشىن ادال ەڭبەك ەتىپ جۇرگەن جۋرناليستەردىڭ بەدەلىنە نۇقسان كەلتىرىپ، وقىرمان اراسىندا بۇقارالىق اقپارات قۇرالدارىنا دەگەن سەنىمسىزدىكتىڭ قالىپتاسۋىنا سەبەپ بولۋى مۇمكىن»، – دەيدى جۋرناليست.
ونىڭ ايتۋىنشا، قۇقىقتىق باعالاۋ ادامنىڭ كاسىبىنە ەمەس، ناقتى ارەكەتىنە بەرىلۋى ءتيىس. جۋرناليست ءوز جازباسىندا اقش پەن ەۋروپادا دا بۇقارالىق اقپارات قۇرالدارى جالعان اقپارات تاراتقانى ءۇشىن جاۋاپكەرشىلىككە تارتىلاتىنىن ەسكە سالىپ، كەز كەلگەن داۋدا تۇپكى ولشەم رەتىندە فاكتىلەر مەن زاڭ تالاپتارى باسشىلىققا الىنۋى كەرەكتىگىن ايتتى.
