عالىمجان سۇلەيمەن وزىنە قاتىستى كۇماندى جاعدايلار جيىلەگەنىن ايتىپ، ومىرىنە قاۋىپ ءتونىپ تۇرعانىن مالىمدەدى، دەپ حابارلايدى "ادىرنا" ۇلتتىق پورتالى.
بۇل تۋرالى ونىڭ زاڭگەرى ينگا يمانباي حابارلادى.
ايتۋىنشا، مۇقاسان شاحزاداەۆ قاتىسى بار ءىس قىلمىستىق كودەكستىڭ 107-بابى — دەنساۋلىققا ورتاشا اۋىرلىقتاعى زيان كەلتىرۋ دەرەگى بويىنشا تەرگەلىپ جاتىر. الايدا جابىرلەنۋشى تاراپ ءىستىڭ التى ايدان بەرى سوتقا جەتپەۋىنە الاڭداۋشىلىق ءبىلدىردى.
عالىمجان سۇلەيمەننىڭ سوزىنشە، جۋىردا اۋلادا بەيتانىس ەكى ادام ونى توقتاتىپ، كۇمان تۋدىرعان ارەكەتتەر جاساعان. سونىمەن قاتار كولىگىنىڭ دوڭگەلەك بۇراندالارىنىڭ بوساپ تۇرعانىن بايقاعانىن ايتتى. ءانشى بۇل وقيعالاردى وزىنە جاسالىپ جاتقان قىسىممەن بايلانىستىرىپ، ءىستىڭ ءادىل تەرگەلۋىن جانە سوتقا جەتكىزىلۋىن تالاپ ەتتى.
زاڭگەر ينگا يمانباي دا تەرگەۋدىڭ ۇزاققا سوزىلۋى كۇمان تۋدىراتىنىن ايتىپ، ىسكە سىرتقى ىقپال بولۋى مۇمكىن ەكەنىن جەتكىزدى.
