فوتو: Almatyzoo
الماتىدا 9 ماۋسىمعا قاراعان ءتۇنى حايۋاناتتار باعىندا ءورت شىقتى. زووباق مالىمەتىنشە، تۇنگى ساعات 00:30-دان كەيىن الماتى حايۋاناتتار باعىنىڭ اۋماعىندا جالعا الۋشىعا تيەسىلى فوتوسالون بۋتيگىندە جانە ونىڭ جانىندا ورنالاسقان ەكسكۋرسيالىق گولف-كارلاردا جالىن شارپىعان، دەپ حابارلايدى "ادىرنا".
وقيعا ورنىنا ورتكە قارسى قىزمەت بولىمشەلەرى جەدەل كەلىپ، ءورت دەر كەزىندە وقشاۋلانىپ، تولىقتاي ءسوندىرىلدى.
قازىرگى ۋاقىتتا ءورتتىڭ شىعۋ سەبەپتەرى ۋاكىلەتتى ورگاندار تاراپىنان انىقتالىپ جاتىر.
وقيعا سالدارىنان حايۋاناتتار باعىنىڭ مۇلكىنە زيان كەلتىرىلمەگەن. قىزمەتكەرلەر مەن جانۋارلار اراسىندا زارداپ شەككەندەر جوق.
قازىرگى ۋاقىتتا الماتى حايۋاناتتار باعى قالىپتى رەجيمدە جۇمىس ىستەپ تۇر.
الماتى قالاسىنىڭ توتەنشە جاعدايلار دەپارتامەنتىنىڭ مالىمەتىنشە، ءورت تۋرالى اقپارات 9 ماۋسىمدا ساعات 00:48-دە تۇسكەن.
وقيعا ورنىنا كەلگەن كەزدە ەكى ەلەكتر-كولىك پەن بالالار پويىزى جانىپ، ءورتتىڭ فوتوبۋتيككە تارالعانى انىقتالعان. ءورتتىڭ جالپى اۋدانى 25 شارشى مەتردى قۇرادى.
بۇل دەرەك بويىنشا قازاقستان رەسپۋبليكاسى قىلمىستىق كودەكسىنىڭ 292-بابىنىڭ 1-بولىگى بويىنشا سوتقا دەيىنگى تەرگەپ-تەكسەرۋدىڭ بىرىڭعاي تىزىلىمىندە قىلمىستىق ءىس تىركەلگەن.
