ارمەنياداعى پارلامەنت سايلاۋىندا بيۋللەتەندەردىڭ 50%-ى وڭدەلگەننەن كەيىن ەل پرەمەر-ءمينيسترى نيكول پاشينياننىڭ بيلىكتەگى «ازاماتتىق كەلىسىم» پارتياسى 51,71% داۋىسپەن كوش باستاپ كەلەدى. بۇل تۋرالى Armenia Today جازدى، دەپ حابارلايدى «ادىرنا» ءتىلشىسى.
ەكىنشى ورىندا 23,2% داۋىس (136 226 داۋىس) جيناعان «كۇشتى ارمەنيا» بلوگى تۇر. ۇزدىك ۇشتىكتى 9,33% (54 768 داۋىس) كورسەتكىشپەن «ارمەنيا» بلوگى تۇيىندەيدى. ودان كەيىن 4,29% سايلاۋشىنىڭ قولداۋىنا يە بولعان (25 218 داۋىس) «گۇلدەنگەن ارمەنيا» پارتياسى ورنالاسقان.
ارمەنيا پارلامەنتىنىڭ سايلاۋى 7 ماۋسىم كۇنى ءوتتى. جەرگىلىكتى ۋاقىت بويىنشا ساعات 20:00-دە بارلىق 2005 سايلاۋ ۋچاسكەسى جابىلىپ، ودان كەيىن داۋىستاردى ساناۋ باستالعان. ورتالىق سايلاۋ كوميسسياسىنىڭ مالىمەتىنشە، سايلاۋعا قاتىسۋ كورسەتكىشى 58,97%-دى قۇراعان. داۋىس بەرۋگە 1 476 697 سايلاۋشى قاتىسقان.
سايلاۋعا 18 ساياسي كۇش قاتىستى. ولاردىڭ قاتارىندا بۇرىنعى پرەزيدەنت روبەرت كوچاريانجەتەكشىلىك ەتەتىن «ارمەنيا» بلوگى، سامۆەل كاراپەتيان باستاعان «كۇشتى ارمەنيا» بلوگى جانە پرەمەر-مينيستر نيكول پاشينيان جەتەكشىلىك ەتەتىن بيلىكتەگى «ازاماتتىق كەلىسىم» پارتياسى بار.
پارلامەنتكە ءوتۋ ءۇشىن ساياسي پارتيالار 4 پايىزدىق مەجەدەن ءوتۋى ءتيىس. ەكى پارتيادان قۇرالعان بلوكتار ءۇشىن شەك 8%، ال ەكى پارتيادان كوپ كۇش بىرىكتىرگەن اليانستار ءۇشىن 10% بولىپ بەلگىلەنگەن. سايلاۋدا ەڭ تومەنگى قاتىسۋ شەگى قاراستىرىلماعان.
