الماتىدا «حالىق ءۇنى» تاۋەلسىز قوعامدىق باقىلاۋشىلار توبىنىڭ ءباسپاسوز كونفەرەنتسياسى ءوتتى.
جيىنعا قاتىسۋشىلار 23 تامىزعا بەلگىلەنگەن قۇرىلتاي دەپۋتاتتارىنىڭ سايلاۋىنا باقىلاۋشىلاردى دايارلاۋ جۇمىستارى باستالعانىن مالىمدەدى. باستاماشىل توپتىڭ قۇرامىنا بۇعان دەيىن سايلاۋلار مەن رەفەرەندۋمداردى باقىلاۋعا قاتىسقان ساياساتتانۋشىلار، جۋرناليستەر جانە ازاماتتىق قوعام وكىلدەرى كىرگەن.
توپ جەتەكشىسى، ساياساتتانۋشى نۇربولات نىشانباەۆتىڭ ايتۋىنشا، باستامانىڭ نەگىزگى ماقساتى – داۋىس بەرۋ بارىسىنا تاۋەلسىز قوعامدىق باقىلاۋ جۇرگىزۋ ارقىلى سايلاۋدىڭ اشىق ءارى ءادىل وتۋىنە ىقپال ەتۋ. ول توپتىڭ قىزمەتى قانداي دا ءبىر ساياسي پارتيانى نەمەسە كانديداتتى قولداۋعا باعىتتالماعانىن اتاپ ءوتتى. نەگىزگى نازار زاڭ تالاپتارىنىڭ ساقتالۋىنا، سايلاۋ پروتسەسىنە قاتىسۋشىلارعا تەڭ جاعداي جاسالۋىنا جانە ءاربىر داۋىستىڭ زاڭعا سايكەس ەسەپتەلۋىنە اۋدارىلاتىنىن ەسكەرتتى.
نۇربولات نىشانباەۆ توپ مۇشەلەرىنىڭ بۇعان دەيىنگى جالپۇلتتىق ساياسي ناۋقانداردى باقىلاۋدا تاجىريبەسى بار ەكەنىن ايتتى. ءار جىلدارى ولاردىڭ وكىلدەرى كونستيتۋتسيالىق رەفەرەندۋمداردا، سونداي-اق ءماجىلىس پەن ءماسليحات دەپۋتاتتارىنىڭ سايلاۋىندا جۇمىس ىستەگەن. قازىرگى ۋاقىتتا ۇيىم داۋىس بەرۋ كۇنى تىكەلەي سايلاۋ ۋچاسكەلەرىندە جۇمىس ىستەيتىن باقىلاۋشىلاردى ىرىكتەۋ جانە وقىتۋ جۇمىستارىنا كىرىستى.
ساياساتتانۋشى بەكنۇر كيسيكوۆ قۇرىلتاي سايلاۋى وكىلدى بيلىكتىڭ دامۋىنداعى جاڭا كەزەڭنىڭ باستالۋىن بىلدىرەتىنىن اتاپ ءوتتى. ونىڭ ايتۋىنشا، «حالىق ءۇنى» ەلىمىزدىڭ اۋماعىندا تاۋەلسىز باقىلاۋشىلار جەلىسىن قالىپتاستىرىپ، داۋىس بەرۋدىڭ اشىقتىعى مەن جاريالىلىعىن قامتاماسىز ەتۋگە اتسالىساتىن جاس قوعامدىق باقىلاۋشىلاردى دايارلاۋعا باسىمدىق بەرەدى.
جۋرناليست ءارى ساياساتتانۋشى نۇرگەلدى ابدىعاني تاۋەلسىز قوعامدىق باقىلاۋ سايلاۋ پروتسەسىنە دەگەن سەنىمدى نىعايتۋدىڭ ماڭىزدى تەتىگى ەكەنىن ايتتى. ونىڭ پىكىرىنشە، ازاماتتاردىڭ باقىلاۋ جۇمىسىنا قاتىسۋى سايلاۋدىڭ اشىق وتۋىنە جانە سايلاۋشىلار ەركىنىڭ قورعالۋىنا ىقپال ەتەدى. سونداي-اق ول بيىلعى ناۋقاندا ازاماتتار وزدەرى سەنىم بىلدىرەتىن باقىلاۋشى ۇيىمدى دەربەس تاڭداي الاتىنىن اتاپ ءوتتى.
باقىلاۋشىلاردى دايارلاۋداعى كوپجىلدىق تاجىريبە تۋرالى توپ مۇشەسى، ساياساتتانۋشى دوس كوشىم دە ايتىپ كەتتى. ونىڭ سوزىنشە، باقىلاۋشىلار سايلاۋ زاڭناماسىن ءبىلىپ قانا قويماي، ۋچاسكەدە جۇمىس ىستەۋدىڭ پراكتيكالىق داعدىلارىن دا مەڭگەرۋگە ءتيىس. وسى ناۋقان اياسىندا ولار ءۇشىن ارنايى ادىستەمەلىك ماتەريالدار مەن ەلەكتروندىق نۇسقاۋلىقتار ازىرلەنگەن. وندا زاڭنامانىڭ قاجەتتى نورمالارى، سونداي-اق داۋىس بەرۋ جانە داۋىستاردى ساناۋ كەزىندە تۋىنداۋى مۇمكىن ءتۇرلى جاعدايلارداعى ءىس-قيمىل الگوريتمدەرى قامتىلعان.
توپ مۇشەسى ەرمۇرات ءباپي قازاقستاندا تاۋەلسىز باقىلاۋ ينستيتۋتى 2019 جىلدان بەرى دايەكتى تۇردە دامىپ كەلە جاتقانىن اتاپ ءوتتى. ونىڭ ايتۋىنشا، قوعامدىق باقىلاۋشىلاردىڭ نەگىزگى مىندەتى جەكەلەگەن ساياسي كۇشتەردى قولداۋ ەمەس، سايلاۋ قورىتىندىسىنا قاراماستان، داۋىستاردىڭ ءادىل، اشىق جانە وبەكتيۆتى ەسەپتەلۋىن قامتاماسىز ەتۋگە ىقپال ەتۋ.
ءباسپاسوز كونفەرەنتسياسىنىڭ قورىتىندىسى بويىنشا «حالىق ءۇنى» وكىلدەرى ەلىمىزدىڭ وڭىرلەرىندە قوعامدىق باقىلاۋشىلار جەلىسىن قالىپتاستىرۋ جۇمىستارىن جالعاستىراتىنىن حابارلادى.
