فوتو: KAREN MINASYAN/AFP VIA GETTY IMAGES
ارمەنيادا ەلدىڭ الداعى سىرتقى ساياسي باعىتىن ايقىندايتىن پارلامەنت سايلاۋى اياقتالدى. سايلاۋ ناۋقانى رەسەيمەن قارىم-قاتىناستىڭ سالقىنداۋى، ەۋروپامەن ىقپالداستىقتى كۇشەيتۋ تالپىنىستارى جانە تاۋلى قاراباق ماسەلەسىنەن كەيىنگى ساياسي وزگەرىستەر اياسىندا ءوتتى. بۇل تۋرالى ۆۆس جازدى، دەپ حابارلايدى “ادىرنا”.
داۋىس بەرۋ جەرگىلىكتى ۋاقىت بويىنشا ساعات 20:00-دە اياقتالىپ، ەل بويىنشا جۇمىس ىستەگەن 2005 سايلاۋ ۋچاسكەسىندە داۋىستاردى ساناۋ باستالدى. پارلامەنتكە ءوتۋ ءۇشىن پارتيالار 4 پايىزدىق مەجەدەن اسۋى ءتيىس بولدى. ال پارتيالىق بلوكتار ءۇشىن سايلاۋ شەگى جوعارى بەلگىلەندى: ءۇش پارتياعا دەيىنگى بىرلەستىكتەرگە – 8 %، ءتورت جانە ودان كوپ پارتيادان قۇرالعان اليانستارعا – 10 %.
سايلاۋ كۇنى ەرەۆانداعى سايلاۋ ۋچاسكەلەرىندە تۇرعىنداردىڭ بەلسەندىلىگى جوعارى بولدى. ارمەنيانىڭ ورتالىق سايلاۋ كوميسسياسىنىڭ مالىمەتىنشە، ساعات 17:00-دەگى جاعداي بويىنشا سايلاۋشىلاردىڭ 48,92 %-ى داۋىس بەرگەن. بۇل كورسەتكىش 2018 جانە 2021 جىلدارداعى پارلامەنت سايلاۋىمەن سالىستىرعاندا جوعارى. ال داۋىس بەرۋ اياقتالعان كەزدەگى جالپى قاتىسۋ دەڭگەيى 58,97 %-دى قۇرادى.
ساراپشىلاردىڭ پىكىرىنشە، جوعارى سايلاۋ بەلسەندىلىگى قوعامداعى ساياسي شيەلەنىس پەن ەل بولاشاعىنا قاتىستى الاڭداۋشىلىقتىڭ كۇشەيگەنىن كورسەتەدى. بيىلعى سايلاۋعا 18 پارتيا مەن ساياسي بلوك قاتىسىپ، پارلامەنتتەگى ورىندار ءۇشىن كۇرەستى. الەۋمەتتىك ساۋالنامالار ناتيجەسى بويىنشا سايلاۋ قارساڭىندا ازاماتتاردىڭ 40 %-ى ەشبىر ساياساتكەرگە سەنبەيتىنىن بىلدىرسە، تاعى 23 %-ى ءوز تاڭداۋىن ءالى جاساماعانىن ايتقان.
سايلاۋشىلار قازىرگى پرەمەر-مينيستر نيكول پاشينيان ۇسىنعان باتىسپەن جاقىنداسۋ باعىتى مەن وپپوزيتسيا ۇسىنعان بالاما ساياسي باعدارلامالاردىڭ ءبىرىن تاڭدادى. وپپوزيتسيا قاتارىندا رەسەيمەن تىعىز بايلانىستاردى قولدايتىن «كۇشتى ارمەنيا» اليانسى مەن بۇرىنعى پرەزيدەنت روبەرت كوچاريان جەتەكشىلىك ەتەتىن «ارمەنيا» بلوگى نەگىزگى ساياسي كۇشتەردىڭ ءبىرى رەتىندە تانىلدى.
سايلاۋ ناتيجەلەرى ارمەنيانىڭ الداعى جىلدارداعى ىشكى جانە سىرتقى ساياساتىنا ەلەۋلى ىقپال ەتۋى مۇمكىن. اسىرەسە رەسەي، ەۋرووداق جانە ازەربايجانمەن قارىم-قاتىناس ماسەلەلەرى جاڭا پارلامەنت جۇمىسىنىڭ نەگىزگى باعىتتارىنىڭ ءبىرى بولماق.
