پرەزيدەنتتىك ۇمىتكەر قاراقات ابدەن Instagram پاراقشاسىنا باعدارلاماسى ءۇشىن ۇيالمايتىنىن ايتتى، دەپ حابارلايدى “ادىرنا” ۇلتتىق پورتالى.
“باعدارلامام ءۇشىن ۇيالمايمىن. سوڭعى 10 كۇن ىشىندە، وزدەرىڭىز بايقاپ وتىرعانداي، ەل ءىشىن ارالاپ، قالىڭ جۇرتشىلىقپەن كوزبە-كوز كەزدەسىپ، اۋىزبا-اۋىز پىكىر الماسىپ ءجۇرمىن. وسى جۇزدەسۋلەر بارىسىندا نازار اۋدارعانىم – حالىق قانداي ماسەلەنىڭ باسىن قوزعاماسىن، بارلىعى دا مەنىڭ سايلاۋالدى باعدارلامامدا كورىنىس تاپقان. وسى ويىمدى بۇگىن ورتالىق شتابتىڭ جۇمىس بارىسىمەن تانىسا كەلگەن تمد باقىلاۋشىلار ميسسياسىنىڭ وكىلدەرى ەۆگەني كوزياك پەن اللا حارچەنكومەن اڭگىمە بارىسىندا ايتتىم.
سايلاۋ ناۋقانىن بىلاي قويا تۇرساق، كەز كەلگەن ادام، ۇلت، ءدىن وكىلى ءۇشىن، ول جەر بەتىنىڭ قاي بولىگىندە تۇرسا دا، ءمانى مەن ماڭىزى باسقالارىنان اركەز بىرنەشە ساتى جوعارى بولاتىن قۇندىلىقتار بولادى – بۇل بەرەكەلى وتباسى، سالاۋاتتى انا، باقىتتى بالالىق شاق جانە ادەمى قارتتىق كەز.
حالىقارالىق باقىلاۋشىلار تاراپىنان سايلاۋالدى باعدارلاماما دا، ساياساتكەر رەتىندە وزىمە دە ەرەكشە دەگەن باعا بەرىلدى. ارينە، بۇل مەن ءۇشىن ۇلكەن قۇرمەت. سونىمەن قاتار حالىقارالىق باقىلاۋشىلار باعدارلامامنىڭ ءار تارماعى ەلىمىزدەگى الەۋمەتتىك احۋالدى جاقسارتىپ، ودان ءارى جەتىلدىرۋگە باعىتتالعانىن، ولاي بولسا، ءاربىر قازاقستاندىق ءۇشىن ماڭىزدى بولىپ كەلەتىنىن باسىپ ايتتى”،- دەپ جازدى ول.
