اتىراۋدا كوگالداندىرۋ جۇمىستارى قارقىندى جۇرگىزىلىپ جاتقانىمەن، ونىڭ تيىمدىلىگىنە قاتىستى قوعامدا ءارتۇرلى پىكىر قالىپتاسۋدا، دەپ حابارلايدى "ادىرنا" ۇلتتىق پورتالى.
مۇناي-گاز سالاسىنداعى وپەراتور كومپانيالاردىڭ ءبىرى North Caspian Operating Company (NCOC) سوڭعى جىلدارى وڭىردە اۋقىمدى اعاش وتىرعىزۋ جوبالارىن جۇزەگە اسىرىپ كەلەدى. كومپانيا مالىمەتىنشە، اتىراۋ وبلىسىنىڭ بىرنەشە اۋماعىندا 248 مىڭنان استام كوشەت جەرسىنگەن.
جوبا 2021 جىلى وبلىس اكىمدىگى مەن ەكولوگيا سالاسىنداعى مەملەكەتتىك ورگاندار اراسىندا جاسالعان مەموراندۋم اياسىندا باستالعان. كوگالداندىرۋ جۇمىستارى بەرەكەدەن بولەك، سوكولوك، ەركىنقالا، ماقات جانە دوسسور اۋماقتارىندا جۇرگىزىلگەن.
الايدا بۇل باستاماعا سىن ايتۋشىلار دا بار. بەلسەندى ارمان حايرۋللين الەۋمەتتىك جەلىدە جاريالاعان پىكىرىندە كومپانيانىڭ ەكولوگيالىق قىزمەتىنە كۇمان كەلتىرىپ، وڭىردەگى گازدى الاۋدا جاعۋ تاجىريبەسىنىڭ قورشاعان ورتاعا كەرى اسەرىن اتاپ ءوتتى. ونىڭ ايتۋىنشا، وندىرىستىك نىسانداردا جىل سايىن جۇزدەگەن ميلليون تەكشە مەتر گازدىڭ جاعىلۋى اتموسفەراعا زيان كەلتىرىپ، تۇرعىنداردىڭ دەنساۋلىعىنا اسەر ەتۋى مۇمكىن.
ال "اتىراۋ ورمان جانە جانۋارلار الەمىن قورعاۋ جونىندەگى مەكەمەسىنىڭ" 2026 جىلعى دەرەگىنە سايكەس، كۇزدە تاعى 60 گەكتار جەرگە كوشەت وتىرعىزۋعا دايىندىق جۇرگىزىلۋدە. ناتيجەسىندە بيىل جالپى 100 گەكتار القاپ يگەرىلەدى دەپ جوسپارلانعان.
مامانداردىڭ سوزىنشە، ءوڭىردىڭ قۋاڭ كليماتىنا بايلانىستى جەرگىلىكتى جەردە وسىرىلگەن كوشەتتەردىڭ جەرسىنۋ كورسەتكىشى جوعارى بولادى. دەگەنمەن سالادا قيىندىقتار دا بار. ماسەلەن، 2024 جىلعى سۋ تاسقىنى كەزىندە 200 گەكتار اۋماقتى سۋ باسىپ، 360 مىڭعا جۋىق كوشەت زارداپ شەككەن.
قازىر اتىراۋ وبلىسىنداعى ورمان قورىنىڭ كولەمى 56 مىڭ گەكتاردان اسادى. «جاسىل بەلدەۋ» باعدارلاماسى اياسىندا 2030 جىلعا دەيىن وڭىردە 5 ميلليون ءتۇپ اعاش وتىرعىزۋ جوسپارلانىپ وتىر.
