قاسىم-جومارت توقاەۆ قازاقستاندا مىندەتتى الەۋمەتتىك مەديتسينالىق ساقتاندىرۋ جۇيەسىنىڭ ىسكە قوسىلعانىنا بەس جىل بولسا دا، سول ۋاقىتتان بەرى بۇل سالانىڭ بيۋدجەتى ەكى ەسە ارتسا دا، مەديتسينالىق كومەكتىڭ ساپاسى جاقسارماعانىن ايتتى، دەپ حابارلايدى "ادىرنا" ۇلتتىق پورتالى.
"تاعى ءبىر ماڭىزدى مىندەت. ەلىمىزدىڭ بارلىق ازاماتىنا بىردەي جاعداي جاساپ، شىن مانىندە كومەككە مۇقتاج ادامدارعا جاردەم بەرۋ – الەۋمەتتىك مەملەكەتتىڭ باستى مىندەتى. قازىر مەملەكەت بيۋدجەتىنىڭ جارتىسىنان كوبى الەۋمەتتىك سالاعا ءبولىنىپ جاتىر. سوڭعى جىلدارى الەۋمەتتىك سالاداعى ينفراقۇرىلىمدى دامىتۋ ءۇشىن ءبىراز جۇمىس اتقارىلدى. الەۋمەتتىك سالا ماماندارىنىڭ، اسىرەسە پەداگوگتەر مەن مەديتسينا قىزمەتكەرلەرىنىڭ بەدەلىن ارتتىرۋعا باسا ءمان بەرىلدى. ەندى ازاماتتارعا كورسەتىلەتىن قىزمەتتىڭ ساپاسىن جاقسارتۋ قاجەت. بۇل – ەڭ الدىمەن، دەنساۋلىق ساقتاۋ سالاسىنا قاتىستى ماسەلە", - دەدى پرەزيدەنت.
مەملەكەت باسشىسى ءوز سوزىندە مىندەتتى الەۋمەتتىك مەديتسينالىق ساقتاندىرۋ جۇيەسىنىڭ ىسكە قوسىلعانىنا بەس جىل بولعانىن اتاپ ءوتىپ، سول ۋاقىتتان بەرى سالا بيۋدجەتى ەكى ەسە ارتقانىن تىلگە تيەك ەتتى.
"بيىل 2,6 تريلليون تەڭگە بولىنەدى. الايدا مەديتسينالىق كومەكتىڭ ساپاسى ايتارلىقتاي جاقساردى دەپ ايتۋعا بولمايدى. كوپتەگەن قىزمەت ءالى دە قولجەتىمدى ەمەس. بۇدان بولەك كوپ جاعدايدا رەسۋرستار ءتيىمسىز جۇمسالادى. سونىڭ سالدارىنان بۇل سالاعا قوسىمشا قارجى ءبولىپ، بيۋدجەتكە سالماق سالۋعا تۋرا كەلەدى. ۇكىمەت مەديتسينالىق ساقتاندىرۋ جۇيەسىنىڭ قىزمەتىن قاتاڭ باقىلاۋعا الۋى كەرەك. بۇل جۇيە قاراپايىم ءارى تۇسىنىكتى بولۋعا ءتيىس", - دەدى پرەزيدەنت.
