ۇلىتاۋ وبلىسى اكىمدىگى مەن «ازاماتتارعا ارنالعان ۇكىمەت» مەملەكەتتىك كورپوراتسياسىنىڭ بىرلەسكەن ەكوجۇيەسى نەگىزىندە قۇرىلعان «Smart Point» تسيفرلىق كەڭسەسىنىڭ اشىلۋىنا وبلىس اكىمى داستان رىسپەكوۆ پەن «ازاماتتارعا ارنالعان ۇكىمەت» مەملەكەتتىك كورپوراتسياسىنىڭ باسقارما توراعاسى ارمان كەنجەعاليەۆ قاتىستى.
«Smart Point» – ءداستۇرلى اكىمشىلىك كەڭىستىك ەمەس، الەمدىك ۇزدىك تاجىريبەلەرگە، سونىڭ ىشىندە Apple Store فورماتىنداعى اشىق ارحيتەكتۋرا قاعيداتتارىنا نەگىزدەلگەن زاماناۋي سەرۆيستىك حاب. ورتالىقتىڭ باستى ماقساتى – تۇرعىندارعا ىڭعايلى، قولجەتىمدى جانە اشىق ورتا قالىپتاستىرىپ، تسيفرلىق تەحنولوگيالاردى كۇندەلىكتى ومىرگە كەڭىنەن ەنگىزۋ.
«بۇگىندە حالىققا مەملەكەتتىك قىزمەتتەردى بارىنشا ىڭعايلى ءارى قولجەتىمدى ەتۋ – باستى مىندەتتەردىڭ ءبىرى. ەندى تۇرعىندار ءتۇرلى قىزمەتتى ءبىر جەردەن، كەزەكسىز ءارى زاماناۋي فورماتتا الا الادى. بۇل — ۋاقىتتى ۇنەمدەۋگە، ارتىق اۋرە-سارساڭدى ازايتۋعا مۇمكىندىك بەرەدى. ەڭ باستىسى، ازاماتتارعا بۇرىنعىداي ءار مەكەمەنى ارالاپ، بانك بولىمشەلەرىنە بارىپ تولەم جاساپ ءجۇرۋدىڭ قاجەتى بولمايدى. بارلىق سەرۆيس ءبىر كەڭىستىكتە قولجەتىمدى بولادى. ۇلىتاۋ وبلىسىنىڭ رەسپۋبليكا بويىنشا مۇنداي فورماتتاعى جوبانى العاش بولىپ ىسكە قوسۋى – ءبىز ءۇشىن ۇلكەن جەتىستىك ءارى ءوڭىردىڭ تسيفرلىق ترانسفورماتسياعا دايىن ەكەنىنىڭ ناقتى كورىنىسى»، – دەدى وبلىس اكىمى داستان رىسپەكوۆ.
جوبا حالىقتىڭ تسيفرلىق ساۋاتتىلىعىن ارتتىرۋعا، وزىنە-ءوزى قىزمەت كورسەتۋ مادەنيەتىن دامىتۋعا جانە مەملەكەتتىك قىزمەتتەردى ۇسىنۋدىڭ جاڭا ساپالى دەڭگەيىن قالىپتاستىرۋعا باعىتتالعان. سونىمەن قاتار، «Smart Point» ازاماتتار مەن مەملەكەتتىك ورگاندار اراسىنداعى ءوزارا ءىس-قيمىلدى جەڭىلدەتىپ، ءوڭىردىڭ تسيفرلىق ترانسفورماتسياسىن جەدەلدەتۋگە ىقپال ەتەدى.
