Ūlytau oblysy äkımdıgı men «Azamattarǧa arnalǧan ükımet» memlekettık korporasiiasynyŋ bırlesken ekojüiesı negızınde qūrylǧan «Smart Point» sifrlyq keŋsesınıŋ aşyluyna oblys äkımı Dastan Ryspekov pen «Azamattarǧa arnalǧan ükımet» memlekettık korporasiiasynyŋ Basqarma töraǧasy Arman Kenjeǧaliev qatysty.
«Smart Point» – dästürlı äkımşılık keŋıstık emes, älemdık üzdık täjıribelerge, sonyŋ ışınde Apple Store formatyndaǧy aşyq arhitektura qaǧidattaryna negızdelgen zamanaui servistık hab. Ortalyqtyŋ basty maqsaty – tūrǧyndarǧa yŋǧaily, qoljetımdı jäne aşyq orta qalyptastyryp, sifrlyq tehnologiialardy kündelıktı ömırge keŋınen engızu.
«Bügınde halyqqa memlekettık qyzmetterdı barynşa yŋǧaily ärı qoljetımdı etu – basty mındetterdıŋ bırı. Endı tūrǧyndar türlı qyzmettı bır jerden, kezeksız ärı zamanaui formatta ala alady. Būl — uaqytty ünemdeuge, artyq äure-sarsaŋdy azaituǧa mümkındık beredı. Eŋ bastysy, azamattarǧa būrynǧydai är mekemenı aralap, bank bölımşelerıne baryp tölem jasap jürudıŋ qajetı bolmaidy. Barlyq servis bır keŋıstıkte qoljetımdı bolady. Ūlytau oblysynyŋ respublika boiynşa mūndai formattaǧy jobany alǧaş bolyp ıske qosuy – bız üşın ülken jetıstık ärı öŋırdıŋ sifrlyq transformasiiaǧa daiyn ekenınıŋ naqty körınısı», – dedı oblys äkımı Dastan Ryspekov.
Joba halyqtyŋ sifrlyq sauattylyǧyn arttyruǧa, özıne-özı qyzmet körsetu mädenietın damytuǧa jäne memlekettık qyzmetterdı ūsynudyŋ jaŋa sapaly deŋgeiın qalyptastyruǧa baǧyttalǧan. Sonymen qatar, «Smart Point» azamattar men memlekettık organdar arasyndaǧy özara ıs-qimyldy jeŋıldetıp, öŋırdıŋ sifrlyq transformasiiasyn jedeldetuge yqpal etedı.
