ۇلتتىق تاربيە ۇلت تىلىنەن باستالادى - قازىبەك يسا

قر پارلامەنتى ءماجىلىسى دەپۋتاتى، اقىن قازىبەك يسا ورىس تىلىندە بايانداماعا جاساعان شەنەۋنىكتەرگە شۇيلىكتى، دەپ حابارلايدى “ادىرنا” ءتىلشىسى. ءتىل جاناشىرى “جۇسىپبەك ايماۋىتۇلىنىڭ “ورىس تاربيەسىن العان بالا ۇلت قىزمەتكەرى بولا المايدى”-دەگەن وسيەتىن ۇكىمەتتەن باستاپ، ەلىمىزدەگى بارلىق مەكتەپكە جازىپ قويۋ كەرەكتىگىمەن ءسوز باستاپ، ۇلتتىق يدەولوگيانىڭ احۋالىن، قازاق بالالارىنىڭ ورىس مەكتەبىنە بارۋىن قولدامايتىندىعىن، ءبىلىم بەرۋ تىلىنە قاراماستان ەلدەگى بار مەكتەپتە قوڭىراۋدىڭ ورنىنا كۇي ويناتۋدى ەنگىزۋ كەرەك” دەپ بىرقاتار ۇسىنىستاردى جەتكىزدى. تامىز ايىنىڭ 24-25 كۇندەرى ەلىمىزدىڭ بارلىق وڭىرىندە «ادىلەتتى قازاقستان: ادال ۇرپاق، ساپالى ءبىلىم، تابىستى ۇلت» تاقىرىبىنداعى ءبىلىم سالاسى قىزمەتكەرلەرىنىڭ رەسپۋبليكالىق تامىز كەڭەسى ءوتتى. جيىندى باستاعان وقۋ-اعارتۋ ءمينيسترى عاني بەكتاەۆ بيىلعى كەڭەستىڭ ەرەكشە فورماتتا ءوتىپ جاتقانىن ايتتى. كەلەلى جيىندا مينيستر 2 تىلدە بايانداما جاساسا، ۆيتسە-پرەمەر بايانداماسىن ورىس تىلىندە جاساعانىن ەسكە سالايىق. وقۋ-اعارتۋ مينيسترلىگىنىڭ ۇلتتىق مۇددەنى نەگىزگە العان ء“بىرتۇتاس تاربيە باعدارلاماسىن” قابىلداعانىن قۋانا قولداعان اقىن جەلىدەگى پاراقشاسىنا: “ۇلتتىق تاربيە ۇلتتىق يدەولوگياسى بار ەلدە ىسكە اسادى. ال بيىلعى استاناداعى جاعداي – ءبىرىنشى سىنىپقا بارعان 25 مىڭ بالانىڭ 40 پايىزى ورىس تىلىنە بارۋى، ورىس سىنىپتارىنىڭ باسىم بولىگى قازاق بالالارى بولۋى تاۋەلسىزدىكتىڭ 32 جىلىنداعى ۇلتتىق يدەولوگيانىڭ ءنول ەكەنىن كورسەتەدى. جاڭا وزدەرىڭىز كۋا بولعانداي، تاۋەلسىز ەل ۇكىمەتىنىڭ يدەولوگيالىق ۆيتسە-پرەمەرى بايانداماسىن رەسەي تىلىندە جاساسا، قانداي ۇلتتىق يدەولوگيا؟!.”-دەپ جازبا قالدىردى.