اقش پرەزيدەنتى دونالد ترامپ سەيسەنبى كۇنى رەسەي ۋكرايناعا قارسى سوعىستى توقتاتۋ تۋرالى كەلىسسوزدەر باستاماسا، جاڭا سانكتسيالار ەنگىزۋ "ىقتيمال" ەكەنىن مالىمدەدى، دەپ حابارلايدى "ادىرنا" ۇلتتىق پورتالى.
ترامپ اقش-تىڭ ۋكرايناعا قارۋ-جاراق جەتكىزۋدى جالعاستىراتىنى تۋرالى ناقتى جاۋاپ بەرمەدى.
ء"بىز زەلەنسكيمەن سويلەستىك. رەسەي پرەزيدەنتى ۆلاديمير پۋتينمەن دە جاقىن ارادا سويلەسەمىز. سودان كەيىن جاعدايدىڭ قالاي ءوربيتىنىن كورەمىز. ءبىز مۇنى مۇقيات قاداعالايمىز", – دەپ جازدى ترامپ Truth Social پاراقشاسىندا.
ول ەگەر 2022 جىلى بيلىكتە ءوزى بولعاندا، ۋكرايناداعى سوعىس ەشقاشان باستالماس ەدى دەپ ەسەپتەيتىنىن ءبىلدىردى.
"رەسەي ۋكرايناعا ەشقاشان باسىپ كىرمەس ەدى. مەنىڭ پۋتينمەن وتە مىقتى كەلىسىمىم بولدى، بۇل ەشقاشان بولماس ەدى. ول بايدەندى سىيلامايدى. ول اقىلدى، ءبارىن تۇسىنەدى", – دەدى
ترامپتىڭ ايتۋىنشا، ۋكراينا پرەزيدەنتى ۆلاديمير زەلەنسكي بەيبىتشىلىك ورناتقىسى كەلەتىنىن ايقىن بىلدىرگەن، بىراق بەيبىتشىلىك ءۇشىن ەكى تاراپتىڭ دا كەلىسىمى قاجەت.
"پرەزيدەنت زەلەنسكي ماعان بەيبىتشىلىكتى قالايتىنىن انىق ايتتى. بىراق بەيبىتشىلىكتى ورناتۋ ءۇشىن ەكى جاقتىڭ دا كەلىسىمى قاجەت. نە بولاتىنىن كورەيىك. قاشان بولسىن، مەن كەزدەسۋگە دايىنمىن. مۇنىڭ اياقتالعانىن كورگىم كەلەدى. ميلليونداعان ادامدار قازا تابۋدا... بۇل – قاتال جاعداي، اسىرەسە قازىر نەگىزىنەن ساربازدار قازا تابۋدا. قالا تۇرعىندارى اراسىندا دا قۇرباندار كوپ بولدى. جويىلعان اۋداندار، قۇلاعان عيماراتتار – بۇل وتە قايعىلى كورىنىس", – دەدى ول.
ترامپ سونىمەن قاتار سوعىس مايدانىندا ادامداردىڭ كوپتەپ قازا تاۋىپ جاتقانىن ايتتى.
"رەسەي شامامەن 800 مىڭ ساربازىن جوعالتتى. ۋكراينا 600-700 مىڭ سارباز جوعالتتى دەپ ويلايمىن، بىراق بۇل ساندار رەسمي جاريالانعانداردان تومەن بولۋى مۇمكىن. ەكى جاقتان دا ۇلكەن شىعىن بار", – دەدى ول.
ەۋرووداقتىڭ ۋكرايناعا كوبىرەك قارجى ءبولۋى كەرەك ەكەنىن ايتقان ترامپ، اقش بۇل ماسەلەدە 200 ميلليارد دوللاردان استام قاراجات جۇمساعانىن جانە بۇل ماسەلە ەۋروپاعا كوبىرەك اسەر ەتەتىنىن اتاپ ءوتتى.
سونداي-اق، ترامپ قىتاي باسشىسى سي تسزينپينمەن اڭگىمە بارىسىندا ۋكراينا ماسەلەسىن تالقىلاعانىن جانە قىتايدىڭ بۇل جاعدايدى رەتتەۋگە ىقپال ەتۋى كەرەكتىگىن ايتقانىن مالىمدەدى.
ۇقساس جاڭالىقتار
