قاراعاندىدا قازاقستان رەسپۋبليكاسىنىڭ مەملەكەتتىك رامىزدەرى كۇنىنە وراي اتتاس الاڭدا كولەمى 20ح10 مەتر بولاتىن الىپ مەملەكەتتىك تۋ جايىلدى. «رامىزدەر رۋحى – كونستيتۋتسيا كۇشى» اتتى پاتريوتتىق فورۋمعا ءتورت مىڭنان استام ادام قاتىستى.
تۋدى قاراعاندى جوعارى وقۋ ورىندارىنىڭ ستۋدەنتتەرى ءوڭىردىڭ تانىمال سپورتشىلارىمەن بىرگە سالتاناتتى تۇردە الىپ ءوتتى. ولاردىڭ قاتارىندا وليمپيادا ويىندارىنىڭ قاتىسۋشىسى دانيل مۇساباەۆ، جاۋىنگەرلىك سامبودان الەم چەمپيونى نيەتحان تولەۋحان جانە اسكەري قىزمەتشىلەر اراسىنداعى ەركىن كۇرەستەن الەم بىرىنشىلىگىنىڭ جۇلدەگەرى ءادىل وسپانوۆ بولدى.
مەرەكەنىڭ ەڭ اسەرلى ساتتەرىنىڭ ءبىرى – مەملەكەتتىك ءانۇراننىڭ كوپشىلىك بولىپ ورىندالۋى بولدى. فورۋم قاتىسۋشىلارىمەن بىرگە ءانۇراندى ۇلتتىق ۇلان ءانسامبلى مەن ماعجان جۇماباەۆ اتىنداعى گيمنازيانىڭ ۆوكالدىق توبى ورىندادى.
ءوڭىر تۇرعىندارىن مەرەكەمەن قاراعاندى وبلىسىنىڭ اكىمى ەرماعانبەت بولەكپاەۆ قۇتتىقتادى.
— مەملەكەتتىك تۋ، ەلتاڭبا جانە ءانۇران – تاۋەلسىزدىگىمىزدىڭ نەگىزى، مەملەكەتتىلىگىمىزدىڭ ەڭ ماڭىزدى نىشاندارى. ولار كونستيتۋتسيامەن بىرگە ەلىمىزدىڭ ەگەمەندىگى مەن تۇراقتى دامۋىنىڭ ءوزارا ساباقتاس تۇعىرلارىن قۇرايدى. قاراعاندى ءوڭىرى – جاسامپاز ەڭبەك داستۇرلەرى مەن بيىك مەملەكەتتىك مۇراتتار ۇيلەسىم تاپقان قاسيەتتى مەكەن. ءبىز ءۇشىن قوعامدىق كەلىسىمدى ساقتاۋ، جاستاردى وتانسۇيگىشتىك رۋحتا تاربيەلەۋ جانە جوعارى ازاماتتىق جاۋاپكەرشىلىكتى قالىپتاستىرۋ — باستى مىندەتتەردىڭ ءبىرى. بۇل باعىتتاعى جۇمىس الداعى ۋاقىتتا دا جۇيەلى تۇردە جالعاسادى. كوك تۋىمىز قازاقستاننىڭ بەيبىت اسپانىندا ءاردايىم اسقاق جەلبىرەسىن، ەلتاڭبامىز ەل تاۋەلسىزدىگىنىڭ ايعاعى بولسىن، ال ءانۇرانىمىز ءار ازاماتتىڭ جۇرەگىنە وتانعا دەگەن ماقتانىش سەزىمىن ۇيالاتسىن، - دەدى ءوڭىر باسشىسى.
سونداي-اق ول وبلىستىڭ دامۋىنا قوسقان ۇلەسى مەن قوعامدىق ومىرگە بەلسەندى قاتىسقانى ءۇشىن بىرقاتار ازاماتقا العىس حاتتار تابىستادى. ماراپاتتالعانداردىڭ قاتارىندا ءبىلىم بەرۋ، عىلىم، دەنساۋلىق ساقتاۋ، سپورت جانە قۇقىق قورعاۋ سالالارىنىڭ وكىلدەرى بار.
مەملەكەتتىك رامىزدەردىڭ ماڭىزى تۋرالى باتۋتتاعى گيمناستيكادان وليمپيادا ويىندارىنىڭ قاتىسۋشىسى دانيل مۇساباەۆ تا ءوز ويىن ءبىلدىردى.
— حالىقارالىق جارىستاردا قازاقستاننىڭ مەملەكەتتىك تۋى كوتەرىلىپ، ءانۇرانىمىز شىرقالعان ساتتە ەلىڭ ءۇشىن ەرەكشە ماقتانىش سەزىمىن باستان كەشەسىڭ. ءاربىر جەڭىستىڭ ارتىندا سپورتشى مەن باپكەرلەردىڭ ەڭبەگى، مەملەكەتتىڭ جانە جانكۇيەرلەردىڭ قولداۋى تۇرادى. سوندىقتان مەملەكەتتىك رامىزدەردى قۇرمەتتەۋ، وتاندى ءسۇيۋ جانە ءوز ەلىڭدى قالاي تانىستىرىپ جۇرگەنىڭە جاۋاپكەرشىلىكپەن قاراۋ — ارقايسىمىز ءۇشىن ماڭىزدى، - دەدى سپورتشى.
فورۋمعا جاستاردىڭ كوپتەپ قاتىسۋى مەرەكەنىڭ ەرەكشە كوڭىل-كۇيىن ايقىنداي ءتۇستى. «بولاشاق» كوللەدجىنىڭ ءبىرىنشى كۋرس ستۋدەنتى ارۋجان نۇرتازينا مۇنداي اۋقىمدى ءىس-شاراعا العاش رەت قاتىسقانىن ايتتى.
— مەملەكەتتىك رامىزدەر كۇنى قازاقستان ءۇشىن ماقتانىش سەزىمىن وياتادى. بۇل مەرەكە ادامداردى بىرىكتىرىپ، تاۋەلسىزدىك، بەيبىتشىلىك پەن بىرلىكتىڭ قادىرىن ەسكە سالادى. ال جاستار ءۇشىن بۇل ەلىمىزدىڭ بولاشاعى الدىنداعى جاۋاپكەرشىلىك تۋرالى ويلانۋعا مۇمكىندىك بەرەتىن ەرەكشە كۇن، - دەيدى ستۋدەنت.
ءداستۇر بويىنشا بۇل كۇنى مەكتەپ وقۋشىلارى «جاس ۇلان» ۇيىمىنىڭ قاتارىنا قابىلداندى. وتىز وقۋشى سالتاناتتى تۇردە انت بەرىپ، كوگىلدىر گالستۋك تاقتى.
فورۋم ءوڭىردىڭ شىعارماشىلىق ۇجىمدارى، ەتنومادەني بىرلەستىكتەردىڭ وكىلدەرى، جاس ورىنداۋشىلار مەن ۇلتتىق ۇلان ءانسامبلى قاتىسقان مەرەكەلىك كونتسەرتپەن اياقتالدى.
سونىمەن قاتار الاڭدا بارىمبەك بەيسەنوۆ اتىنداعى قاراعاندى اكادەمياسى كۋرسانتتارىنىڭ قاتىسۋىمەن تۋلار شەرۋى ءوتتى.
