اقتوبەدەگى «ونەر ورتالىعىندا» وتكەن فورۋمعا قاتىسۋ ءۇشىن رەسەيدەن جانە قازاقستاننىڭ ءارتۇرلى وڭىرلەرىنەن دەلەگاتسيالار كەلدى. بۇل شارا مەرەيتويلىق جىلدىڭ ەڭ ماڭىزدى وقيعالارىنىڭ ءبىرى رەتىندە اتاپ ءوتىلدى.
فورۋمنىڭ ماقساتى — باتىرلىقتىڭ، وتانعا دەگەن سۇيىسپەنشىلىك پەن ءپاتريوتيزمنىڭ سيمۆولىنا اينالعان مەرگەن قىزدىڭ رۋحىنا تاعزىم ەتۋ. شاراعا مەملەكەتتىك جانە قوعام قايراتكەرلەرى، قازاقستان رەسپۋبليكاسى پارلامەنتىنىڭ سەناتى مەن ءماجىلىسىنىڭ دەپۋتاتتارى، مادەنيەت جانە عىلىم سالاسىنىڭ وكىلدەرى، سونداي-اق باتىردىڭ تۋىستارى قاتىستى.
قازاقستان رەسپۋبليكاسى پرەزيدەنتىنىڭ كەڭەسشىسى مالىك وتارباەۆ مەملەكەت باسشىسى اتىنان فورۋمعا قاتىسۋشىلار مەن اقتوبەلىكتەردى وسى ماڭىزدى تاريحي وقيعامەن قۇتتىقتادى.
«ءاليا مولداعۇلوۆا – بۇكىل قازاق حالقىنىڭ ماقتانىشى، قايسار رۋح پەن جانقيارلىقتىڭ سيمۆولى. بۇگىنگى فورۋم – تاريحي جادىمىزدى ساقتاۋ مەن جاس ۇرپاقتى پاتريوتتىق رۋحتا تاربيەلەۋ جولىنداعى ورتاق جاۋاپكەرشىلىگىمىزدىڭ كورىنىسى. فورۋمدى ۇيىمداستىرعان بارشا ازاماتتارعا، ءاليا مولداعۇلوۆانىڭ ەرلىگىن ۇرپاق جادىندا ماڭگى قالدىرۋعا اتسالىسىپ جۇرگەن جاندارعا شىنايى العىسىمدى بىلدىرەمىن. سىزدەر جاستاردى وتانعا دەگەن سۇيىسپەنشىلىككە، ۇلتتىق قۇندىلىقتارعا ادالدىققا باۋلىپ كەلەسىزدەر»، – دەدى پرەزيدەنت كەڭەسشىسى.
شاراعا قاتىسۋشىلاردى اقتوبە وبلىسىنىڭ اكىمى اسحات شاحاروۆ تا قۇتتىقتاپ، باتىر ەسىمىن ۇلىقتاۋ باعىتىندا وڭىردە جۇزەگە اسىپ جاتقان جۇمىستار تۋرالى ايتىپ ءوتتى. اتاپ ايتقاندا، اقتوبە قالاسىندا جاڭا مادەنيەت ورتالىعى مەن مەموريالدىق مۋزەي سالىنىپ جاتىر، سونداي-اق ءاليا اۋىلىندا ينفراقۇرىلىم دامىپ كەلەدى.
اسحات شاحاروۆ ءوز سوزىندە پەداگوگ ءارى قوعام قايراتكەرى، ءاليانىڭ ەرلىگىن زەرتتەۋگە جانە جاستارعا رۋحاني-ادامگەرشىلىك تاربيە بەرۋگە ءومىرىن ارناعان عالىمجان بايدەربەستىڭ ەڭبەگىن ەرەكشە اتاپ ءوتتى.
فورۋم بارىسىندا ءاليا مولداعۇلوۆانىڭ ەرلىگىنە، تاريحي جادىنى ساقتاۋ جولىنداعى زەرتتەۋشىلەر مەن قوعام بەلسەندىلەرىنىڭ ۇلەسىنە، سونداي-اق مۋزەيلىك جانە مادەني جوبالاردىڭ پاتريوتتىق تاربيەدەگى رولىنە ارنالعان مازمۇندى باياندامالار تىڭدالدى. ءسوز العاندار قاتارىندا – عىلىم وكىلدەرى، مۋزەي قىزمەتكەرلەرى، باتىردىڭ تۋىستارى مەن ارنايى شاقىرىلعان قوناقتار بولدى.
ياروسلاۆل وبلىسىنداعى «ۆياتيچ» پاتريوتتىق ورتالىعىنىڭ جەتەكشىسى ليۋبوۆ ابراموۆا ۆياتسكوە اۋىلىندا باتىر قىزدىڭ رۋحىنا دەگەن قۇرمەت ەرەكشە ەكەنىن ايتىپ ءوتتى. 1942 جىلى ءاليا مولداعۇلوۆا لەنينگراد قورشاۋىنان ەۆاكۋاتسيالانعان بالالارمەن بىرگە ۆياتسكوە اۋىلىنا جەتكىزىلگەن ەدى.
«ءبىز ياروسلاۆل وبلىسى ۆياتسكوە اۋىلىنان كەلدىك. وڭىرلەرىمىزدى ەكى مىڭ شاقىرىمداي قاشىقتىق بولگەنىمەن، ءاليا مولداعۇلوۆانىڭ ەسىمى ءبىزدى بەرىك بايلانىستىرىپ تۇر. ياروسلاۆل جەرىندە ونىڭ ەسىمى زور قۇرمەتپەن اتالادى: باتىرلىق مەموريالىندا ەسىمى قاشالىپ جازىلعان، اۋىل مەكتەبىندە قۇجاتتار مەن فوتوسۋرەتتەر قويىلعان ارنايى مۋزەي اشىلعان. 1942 جىلى ءاليا ءبىزدىڭ مەكتەبىمىزدە 7-سىنىپتا وقىدى، سوندىقتان ءبىز ونى زور ماقتانىشپەن ءوزىمىزدىڭ تۇلەك دەپ اتايمىز. ۆياتسكوە اۋىلىنا كەلگەن ءاربىر تۋريست ءاليانىڭ ەرلىگى جايلى بىلەدى. ونىڭ بەينەسى اۋىلىمىزدىڭ مادەني-تاريحي ءومىرىنىڭ اجىراماس بولشەگىنە اينالدى»، – دەدى ليۋبوۆ ابراموۆا.
شارا سوڭىندا حالىق ماحابباتى مەن العىسىنا بولەنگەن، 50 جىلدىق تاريحى بار «ءاليا» ءانى شىرقالدى. ءاندى ساحنادا ءانشى مەرەي سامۇرات تەبىرەنە ورىنداپ، كورەرمەندەردىڭ زور قوشەمەتىن يەلەندى.
فورۋمعا دەيىن ءاليانىڭ مەموريالدىق كەشەنىندە مادەني-تانىمدىق شارا ءوتتى. مەرەيتويعا ارنايىلاپ كەلگەن مەيماندار مەن اقتوبەلىكتەر اتى اڭىزعا اينالعان مەرگەن قىزدىڭ جارقىن بەينەسىن ءبىر مينۋت ۇنسىزدىكپەن ەسكە الىپ، گۇل شوقتارىن قويدى.
