فوتو: repotr
يتاليانىڭ سولتۇستىگىندەگى مودەنا قالاسىندا جەڭىل كولىك ءبىر توپ ادامدى قاعىپ كەتتى. وقيعا قوعامدا ۇلكەن رەزونانس تۋدىرىپ، جەرگىلىكتى بيلىك پەن قۇقىق قورعاۋ ورگاندارى تەرگەۋ جۇمىستارىن باستادى، دەپ حابارلايدى “ادىرنا” پورتالى ANSA باسىلىمىنا سىلتەپ.
الدىن الا مالىمەتتەر بويىنشا، كولىكتى 31 جاستاعى ەر ادام باسقارعان. باق حابارلاۋىنشا، ول 2022 جىلدان بەرى پسيحيكالىق دەنساۋلىعىنا بايلانىستى باقىلاۋدا بولعان. اتاپ ايتقاندا، ەر ادامنان شيزوفرەنيا بەلگىلەرى بايقالعانى ايتىلدى.
مودەنا باسشىسى فابريتسيا ءتريولونىڭ مالىمدەۋىنشە، وقيعا كەزىندە ەر ادام ەم قابىلداپ جۇرمەگەن. سونداي-اق ونىڭ جۇمىسسىز بولعانى بەلگىلى بولدى.
جەرگىلىكتى اقپارات قۇرالدارىنىڭ دەرەگىنە سايكەس، جۇرگىزۋشى كولىگىمەن قالا كوشەسىندە ادامدار توبىنا ادەيى نەمەسە باقىلاۋسىز تۇردە سوعىلعان. سالدارىنان كەمىندە جەتى ادام زارداپ شەكتى. ولاردىڭ تورتەۋىنىڭ جاعدايى اۋىر دەپ باعالانۋدا. 55 جاستاعى ايەل اۋىر حالدە اۋرۋحاناعا جەتكىزىلسە، تاعى ءبىر ايەل ەكى اياعىنان ايىرىلعان.
وقيعا ورنىندا كۇدىكتىنى ۇستاۋ كەزىندە دە جانجال بولعانى حابارلاندى. Il Giornale گازەتىنىڭ جازۋىنشا، ەر ادام قاشۋعا ارەكەت جاساپ، ءوزىن توقتاتۋعا تىرىسقان ادامدى پىشاقپەن جارالاعان بولۋى مۇمكىن.
كەيىنىرەك Gazzetta di Parma باسىلىمى كۇدىكتىنىڭ Citroën C3 ماركالى كولىكتى باسقارعانىن ناقتىلادى.
قازىرگى ۋاقىتتا قۇقىق قورعاۋ ورگاندارى وقيعانىڭ ناقتى سەبەپتەرى مەن ءمان-جايىن انىقتاپ جاتىر. تەرگەۋ جالعاسۋدا.
