Subaru ماركالى اۆتو كولىگىن باسقارعان ءجاسوسپىرىم الماتى وبلىسىندا 6 بالانى قاعىپ كەتتى، دەپ حابارلايدى "ادىرنا" ءتىلشىسى.
الماتى وبلىسىندا 21 قىركۇيەك كۇنى 15 جاستاعى ءجاسوسپىرىم كولىك تىزگىنىنە يە بولا الماي، تروتۋاردا التى بالانى قاعىپ كەتكەنى تۋرالى الماتى وبلىسى پوليتسيا دەپارتامەنتىنىڭ ءباسپاسوز قىزمەتى حابارلادى.
"21 قىركۇيەكتە رايىمبەك اۋدانىنىڭ ببب-عا 15 جاسار كامەلەتكە تولماعان بالا نارىنقول كەنتىندە Subaru ماركالى كولىك قۇرالىن باسقارا وتىرىپ، ءرۋلدى باسقارا الماي، تروتۋارعا شىعىپ، جاياۋ جۇرگىنشىلەردى قاعىپ كەتكەنى تۋرالى حابارلاما كەلىپ ءتۇستى. وسى جول-كولىك وقيعاسى سالدارىنان 2008 جىلى تۋعان التى كامەلەتكە تولماعان بالا زارداپ شەكتى، ولاردىڭ بەسەۋى ءارتۇرلى دەنە جاراقاتتارىمەن اۋرۋحاناعا جاتقىزىلدى", - دەلىنگەن حابارلامادا.
قر قك 345-بابىنىڭ 2-بولىگى (كولىك قۇرالدارىن باسقاراتىن ادامداردىڭ جول ءجۇرىسى نەمەسە كولىك قۇرالدارىن پايدالانۋ قاعيدالارىن بۇزۋى) بويىنشا قىلمىستىق ءىس قوزعالدى.
"قازىرگى ۋاقىتتا ساراپتامالىق تەكسەرۋلەر تاعايىنداۋمەن تەرگەۋ ارەكەتتەرى جۇرگىزىلۋدە. ايتا كەتەيىك، كامەلەتكە تولماعان بالا ءوزىنىڭ اعاسى بولىپ تابىلاتىن كولىك يەسىنە ەسكەرتپەستەن كولىك كىلتىن الىپ كەتكەن. دۇكەنگە بارا جاتقان جولدا وسى وقيعا ورىن العان",-دەلىنگەن.
