تۇركىستاندا ترياتلون سپورتىنان قازاقستان رەسپۋبليكاسىنىڭ اشىق كۋبوگى ءوتىپ جاتىر. تۇركىستان وبلىسى اكىمدىگىنىڭ قولداۋىمەن، قازاقستان ترياتلون فەدەراتسياسىنىڭ ۇيىمداستىرۋىمەن ەكى كۇنگە سوزىلاتىن سپورتتىق جارىس بۇگىن باستالدى، دەپ حابارلايدى “ادىرنا”.
ايتا كەتەيىك، ترياتلون – بۇل ءۇش تسيكلدىق سپورت تۇرىنەن، ياعني، ءجۇزۋ، ۆەلوسپورت جانە جۇگىرۋدەن تۇراتىن قيىن سپورت ءتۇرى.
جارىسقا قاتىسۋشىلار سايىستى پرەزيدەنت ساياباعىنداعى جاساندى كولدە جۇزۋدەن باستاپ، ب.ساتتارحانوۆ داڭعىلىمەن ۆەلوسيپەدپەن ءجۇرىپ ءوتتى. ارى قاراي «Olympic Center» سپورت كەشەنىنە دەيىن جەتكەن ۆەلوشاباندوزدار ودان كەيىن جۇگىرۋدەن جارىستى. اتاپ وتەيىك، ترياتلوننىڭ سپرينت تۇرىندە 750 مەترگە ءجۇزۋ، 20 شاقىرىمعا ۆەلوجارىس جانە 5 شاقىرىمعا جۇگىرۋ نورماسىن ورىنداۋى كەرەك.
سپورتشىلار توزىمدىلىگى شىڭدالاتىن جارىستا ۇلدار اراسىندا
ءبىرىنشى ورىندى الماتى قالاسىنان انۋار تۋرۋباەۆ يەلەنسە، 2-ورىن ەگور كرۋپياكوۆ (الماتى قالاسى), 3-ورىن الەكساندر تەنگە (الماتى قالاسىنان) بۇيىردى. ال قىزدار اراسىندا
1-ورىنعا ەكاتەرينا شابالينا شىقسا، (نۇر-سۇلتان قالاسى), 2-ورىندى يۋليا وزەروۆا (الماتى قالاسى), 3-ورىندى داريا بىگكوۆا (قوستاناي) ەنشىلەدى.
جەڭىمپازداردى وبلىس اكىمىنىڭ ورىنباسارى ساكەن قالقامانوۆ ماراپاتتاپ، قۇتتىقتاۋ ءسوز سويلەدى. جارىس ەكى كۇنگە سوزىلادى.
”ادىرنا” ۇلتتىق پورتالى
