Германия Украинаға IRIS-T зениттік-зымыран кешенінің жаңа ұшыру қондырғысын берді. Бұл туралы Украина президенті Владимир Зеленский мәлімдеді, деп хабарлайды "Адырна".
Мемлекет басшысының айтуынша, Ресей соңғы аптада Украинадағы азаматтық инфрақұрылым нысандарына жаппай шабуыл жасаған. Атап айтқанда, Ресей әскері 2300 соққы беруші дронды, шамамен 1560 басқарылатын авиациялық бомбаны және түрлі үлгідегі 108 зымыранды қолданған.
Зеленскийдің сөзінше, Германия тарапынан көрсетіліп жатқан әскери қолдау мыңдаған адамның өмірін сақтап қалуға мүмкіндік беріп отыр.
«Кеше біз жаңа IRIS-T ұшыру қондырғысын алдық. Адамдарды қорғауға қосқан тұрақты үлесі үшін Германияға алғыс білдіреміз. Осындай қуатты қолдаудың арқасында мыңдаған адамның өмірін сақтап қалуға мүмкіндік туды», – деді Украина президенті.
Сонымен қатар Зеленский елге әуе шабуылына қарсы қорғаныс жүйелеріне арналған қосымша зымырандар қажет екенін атап өтті. Оның айтуынша, Ресейдің әуе шабуылдарының қарқындылығы жоғары болып отырғандықтан, Украина қорғаныс әлеуетін күшейтуге мүдделі.
IRIS-T – Германияда жасалған заманауи әуе шабуылына қарсы қорғаныс жүйесі. Ол дрондарды, ұшақтарды, тікұшақтарды және қанатты зымырандарды жоюға арналған. Соғыс басталғалы бері Германия Украинаға бірнеше IRIS-T кешенін жеткізіп, елдің әуе қорғанысын нығайтуға қолдау көрсетіп келеді.
Украина билігі халықаралық серіктестерден қосымша әуе қорғаныс құралдарын беру мәселесі ел қауіпсіздігін қамтамасыз етудегі басты басымдықтардың бірі болып қала беретінін мәлімдеді.
