اقش مەملەكەتتىك دەپارتامەنتى گازادان شىققان ادامدارعا بارلىق ساناتتاعى ۆيزالاردى ۋاقىتشا بەرۋدى توقتاتتى، دەپ حابارلايدى “ادىرنا” ۇلتتىق پورتالى DW-گە سىلتەمە جاساپ.
بۇل شەشىم تولىق ءارى مۇقيات تەكسەرىس جۇرگىزىلگەنگە دەيىن كۇشىندە بولادى.
ۆەدومستۆونىڭ مالىمەتىنشە، سوڭعى ۋاقىتتا انكلاۆ تۇرعىندارىنا مەديتسينالىق جانە گۋمانيتارلىق نەگىزدە عانا ازداعان ۋاقىتشا ۆيزالار بەرىلگەن.
ماسەلەن، 2025 جىلدىڭ وزىندە پالەستينا ۇلتتىق اكىمشىلىگىنىڭ قۇجاتى بار ازاماتتارعا 3800-دەن استام ۆ1/ۆ2 قوناق ۆيزاسى راسىمدەلگەن. تەك مامىر ايىنىڭ ىشىندە 640 ۆيزا بەرىلگەن.
امەريكا-يسلام قاتىناستارى جونىندەگى كەڭەس شەشىمدى ايىپتاپ، ونى دونالد ترامپ اكىمشىلىگىنىڭ قاساقانا قاتىگەزدىگى دەپ باعالادى. ال پالەستينا بالالارىن قولداۋ قورى مۇنداي قادام گازاداعى اۋىر ناۋقاس جانە جارالانعان بالالاردىڭ اقش-تا ەم الۋ مۇمكىندىگىن شەكتەيتىنىن مالىمدەدى.
ايتا كەتەيىك، ترامپ اكىمشىلىگى ساپارلارعا قويىلاتىن شەكتەۋلەردى ايتارلىقتاي قاتاڭداتۋ مۇمكىندىگىن قاراستىرىپ جاتىر. بۇل باستاما اقش-قا تاعى 36 ەلدىڭ ازاماتتارىنىڭ كىرۋىنە تىيىم سالۋعا اكەلۋى ىقتيمال.
