اقش پرەزيدەنتى دونالد ترامپتىڭ اكىمشىلىگى گارۆارد ۋنيۆەرسيتەتىن شەتەلدىك ستۋدەنتتەردى وقىتۋ قۇقىعىنان ايىردى. بۇل تۋرالى اقش-تىڭ ىشكى قاۋىپسىزدىك مينيسترلىگى مالىمدەدى، دەپ حابارلايدى “ادىرنا” ۇلتتىق پورتالى ۆۆس-گە سىلتەپ.
اقش-تىڭ ىشكى قاۋىپسىزدىك ءمينيسترى كريستي نوەم گارۆارد ۋنيۆەرسيتەتىنىڭ ستۋدەنتتەرمەن الماسۋ باعدارلامالارىن جۇزەگە اسىرۋعا ارنالعان سەرتيفيكاتىنىڭ كۇشىن جويۋ تۋرالى بۇيرىق بەردى. امەريكادا وقۋدى جوسپارلاعان شەتەلدىكتەر F نەمەسە M ساناتىنداعى ۆيزا الۋى ءتيىس. مۇنداي ۆيزالاردى تەك شەتەلدىك ستۋدەنتتەر مەن الماسۋ باعدارلامالارى قاتىسۋشىلارىن قابىلداۋعا سەرتيفيكاتتالعان وقۋ ورىندارى (SEVP) عانا راسىمدەي الادى.
بۇل ەندى گارۆارد ۋنيۆەرسيتەتى شەتەلدىك ستۋدەنتتەردى قابىلداي المايدى دەگەندى بىلدىرەدى. قازىرگى ۋاقىتتا گارۆاردتا وقىپ جۇرگەن شەتەلدىك ستۋدەنتتەر باسقا ۋنيۆەرسيتەتكە اۋىسۋعا ءماجبۇر بولادى، ايتپەسە ەلدە قالۋ قۇقىعىنان ايىرىلادى.
ۋنيۆەرسيتەت مالىمەتى بويىنشا، وتكەن وقۋ جىلىندا گارۆاردتا شامامەن 7000 شەتەلدىك ستۋدەنت وقىعان — بۇل جالپى ستۋدەنتتەردىڭ 27,2%-ىن قۇرايدى.
«اكىمشىلىك گارۆاردتى زورلىق-زومبىلىقتى ورشىتۋگە، انتيسەميتيزمگە جانە قىتايدىڭ كوممۋنيستىك پارتياسىمەن بايلانىس ورناتۋعا جاۋاپتى دەپ سانايدى»، — دەدى كريستي نوەم.
ول سونداي-اق ۋنيۆەرسيتەتتەر ءۇشىن «شەتەلدىك ستۋدەنتتەردى قابىلداۋ — قۇقىق ەمەس، ارتىقشىلىق» جانە «ولار وقۋ اقىسىنىڭ جوعارى بولۋىنان پايدا كورىپ وتىر» دەپ اتاپ ءوتتى.
