مانەرلەپ سىرعاناۋشى، وليمپيادا چەمپيونى ميحايل شايدوروۆ جالاقى تولەمدەرى مەن كەلىسىمشارتقا قاتىستى تۋريزم جانە سپورت مينيسترلىگىنىڭ تۇسىنىكتەمەسىنە جاۋاپ بەردى، دەپ حابارلايدى «ادىرنا» ءتىلشىسى.
سپورتشى قازاقستاندىقتارعا قولداۋ كورسەتكەنى ءۇشىن العىس ايتىپ، مەملەكەتتىك ورگاندارمەن «داۋلاسقىسى كەلمەيتىنىن»، الايدا جاعدايعا تۇسىنىك بەرۋدى ماڭىزدى سانايتىنىن مالىمدەدى.
شايدوروۆتىڭ ايتۋىنشا، ول 2025 جىلى الەم چەمپيوناتىندا كۇمىس جۇلدە جەڭىپ الىپ، ەڭبەك سىڭىرگەن سپورت شەبەرى اتاعىنا قويىلاتىن تالاپتى ورىنداعانىمەن، وسى ۋاقىتقا دەيىن ءتيىستى كۋالىكتى الماعان.
«ماعان قىزىل كىلەم توسەلگەن سالتاناتتى ءراسىمنىڭ قاجەتى جوق. كۋالىكتى پوشتا ارقىلى كونۆەرتپەن جىبەرسە دە الۋعا دايىنمىن. بۇل كۋالىك – ون جىلدىق ەڭبەگىمنىڭ ناتيجەسى. وليمپيادا ويىندارىنداعى جەڭىس ءۇشىن بەرىلەتىن سىياقىعا كەلسەك، بۇل ءراسىمنىڭ بەلگىلى ءبىر ۋاقىتتى قاجەت ەتەتىنىن بىلەمىن جانە وسى باعىتتا جۇمىس ءجۇرىپ جاتقانىنا سەنىمدىمىن. بۇل ماسەلەگە قاتىستى مەنىڭ ەشقانداي شاعىمىم جوق»، – دەدى ول.
سپورتشى ءومىر بويى تولەنەتىن تولەمدەرگە قاتىستى اقپاراتتى مينيسترلىك دۇرىس تۇسىندىرمەگەنىن جەتكىزدى. شايدوروۆ مۇنداي تولەمدەردى الۋ ءۇشىن كەمىندە 20 جىل ەڭبەك ءوتىلى بولۋى قاجەت ەكەنىن، ال ءوزىنىڭ جاسى نەبارى 21-دە ەكەنىن ايتتى. سوندىقتان مۇنداي قولداۋ تۋرالى ءسوز قوزعاۋعا ءالى ەرتە ەكەنىن اتاپ ءوتتى.
«جالاقى ماسەلەسىنە كەلسەك. باسقا دا كوپتەگەن جوعارى دارەجەلى سپورتشىلار سياقتى مەن جالاقىنى فەدەراتسيا مەن سپورتتى دامىتۋ ديرەكتسياسىنان الامىن. فەدەراتسيامەن كەلىسىمشارت جاسالعان. بىراق ماعان ايتىلعانداي، سپورتتى قولداۋ قورى قارجىلاندىرۋ تۋرالى ءوتىنىمدى قاراپ جاتقاندىقتان تولەمدەر كەشىكتىرىلۋدە. سونىڭ سالدارىنان مەن دە، مەنىڭ كوماندام دا بەس ايدان بەرى جالاقى العان جوق. ال سپورتتى دامىتۋ ديرەكتسياسى ماعان قاڭتار ايىنىڭ جانە 2026 جىلدىڭ 22 اقپانىنا دەيىنگى كەزەڭنىڭ جالاقىسىن تولەدى»، – دەدى شايدوروۆ.
ول 2026 جىلعا ارنالعان جاڭا كەلىسىمشارتتى تالقىلاۋ تەك مامىر ايىنىڭ ورتاسىندا باستالعانىن حابارلادى، بۇل ونىڭ وكىلدەرمەن جازىسقان حاتتارىمەن راستالادى. سپورتشىنىڭ ايتۋىنشا، كەلىسىمنىڭ ءالى كۇنگە دەيىن ماقۇلدانباۋى باق-تا ايتىلىپ جۇرگەندەي سومامەن كەلىسپەۋشىلىكتەن نەمەسە قاتىسۋدان باس تارتۋدان ەمەس، مۇلدەم باسقا سەبەپتەرگە بايلانىستى. سونداي-اق ول 2026 جىلدىڭ سوڭىنا دەيىن جارامدى كەلىسىمشارت جوباسىندا 2030 جىلعى وليمپيادا ويىندارىندا مەدال جەڭىپ الۋ تۋرالى مىندەتتەمە كورسەتىلگەنىن اتاپ ءوتتى.
ء«بىز زاڭدىق تۇرعىدان بۇل تارماقتى قايتا قاراۋدى سۇرادىق. سەبەبى بۇل – قيسىنسىز ءارى مۇمكىن ەمەس تالاپ. مەن 2026 جىلى ءتورت جىلدان كەيىن وتەتىن وليمپيادادا جەڭىسكە جەتە المايمىن عوي. وسى ماسەلەلەر بويىنشا زاڭگەرلەرگە جۇگىندىك، تارماقتى قايتا قاراۋدى وتىندىك. بىراق بۇقارالىق اقپارات قۇرالدارىندا ايتىلىپ جۇرگەندەي بىزبەن ەشكىم بايلانىسقا شىققان جوق. قازىر بولىپ جاتقان جاعدايلاردى ەسكەرە وتىرىپ، تولەمدەر، كەلىسىمشارت جاساۋ جانە باسقا دا ماسەلەلەر ادەيى سوزىلىپ كەلگەن سياقتى دەگەن ويدامىن. سوندىقتان بۇل تۋرالى اشىق ايتتىم»، – دەپ قوستى وليمپيادا چەمپيونى.
شايدوروۆ سۇيىكتى ىسىمەن اينالىسىپ جۇرگەندىكتەن ءوزىن باقىتتى سەزىنەتىنىن ايتتى. ول اقشا باستى ماقسات ەمەس ەكەندىگىن، تەك بۇرىن بەرىلگەن ۋادەلەردىڭ ورىندالۋىن كۇتەتىنىن جەتكىزدى.
بۇعان دەيىن ءماجىلىس دەپۋتاتى اسحات راحىمجانوۆ ميحايل شايدوروۆتىڭ بىرنەشە اي بويى جالاقى الماۋىنا بايلانىستى جاعدايدى رەتتەپ، كىنالىلەردى جاۋاپقا تارتۋ قاجەت ەكەنىن ايتقان بولاتىن.
