مانەرلەپ سىرعاناۋدان قازاقستاننىڭ ۇزدىك سپورتشىسى، قىسقى وليمپيادا چەمپيونى ميحايل شايدوروۆ Threads الەۋمەتتىك جەلىسىندە جانكۇيەرلەرىنە ۇندەۋ جاساپ، وزىنە قاتىستى سوڭعى كەزدە تاراعان داۋلى اقپاراتتارعا پىكىر ءبىلدىردى. ول جەلىدە ايتىلعان بىرقاتار مالىمەتتەردى جوققا شىعارىپ، جاعدايعا قاتىستى ءوز ۇستانىمىن اشىق ايتتى، دەپ حابارلايدى "ادىرنا".
الدىمەن سپورتشى قيىن ساتتە قولداۋ كورسەتكەن قازاقستاندىقتارعا العىس ءبىلدىردى. ونىڭ ايتۋىنشا، الەۋمەتتىك جەلىلەردەگى جىلى لەبىزدەر مەن جەكە حاتتار ۇلكەن دەمەۋ بولعان.
«بارشا قازاقستاندىققا قولداۋلارى مەن بەيجاي قاراماعانى، الەۋمەتتىك جەلىلەردەگى كوپتەگەن جازبالارى مەن جىلى لەبىزدەرى جازىلعان جەكە حاتتارى ءۇشىن العىس ايتقىم كەلەدى. جالعان اقپاراتتار اعىنىنا ەرمەي، ماعان سەنىم ارتقاندارىڭىز ءۇشىن راقمەت. سىزدەردىڭ سەنىمدەرىڭىز مەن ءۇشىن وتە ماڭىزدى»، – دەپ جازدى سپورتشى.
سپورتشى كەيبىر تۇيتكىلدى ماسەلەلەردىڭ تەك قوعام تالقىسىنا شىققاندا عانا شەشىلەتىنىنە وكىنىش ءبىلدىردى. ول ەشقانداي مەملەكەتتىك ورگانمەن تەكەتىرەسكە تۇسكىسى كەلمەيتىنىن، بىراق ءوز ابىرويىن قورعاۋعا دايىن ەكەنىن اشىق ايتتى.
«كەيبىر ماسەلەلەردى كوپشىلىككە جاريا ەتپەيىنشە، شەشۋ مۇمكىن ەمەس ەكەنىنە، شىن مانىندە، وكىنەمىن. قانداي دا ءبىر ورگاندارمەن ەسەپ ايىرىسىپ، ايتىسقىم كەلمەيدى، بىراق مەنىڭ اتىمدى كوپشىلىك الدىندا قارالاۋعا جول بەرمەيمىن»، – دەدى شايدوروۆ.
سپورتشى سوڭعى ۋاقىتتا قىزۋ تالقىلانعان «سپورت شەبەرى» كۋالىگىنە قاتىستى دا تۇسىنىك بەردى. ونىڭ ايتۋىنشا، ءتيىستى نورماتيۆ ورىندالعانىمەن، رەسمي قۇجات ءالى كۇنگە دەيىن بەرىلمەگەن.
بۇگىنگە دەيىن سپورتشىعا «قازاقستان رەسپۋبليكاسىنىڭ ەڭبەك سىڭىرگەن سپورت شەبەرى» كۋالىگى بەرىلمەگەن. شايدوروۆ بۇل جوعارى ءنورماتيۆتى 2025 جىلى الەم چەمپيوناتىندا كۇمىس جۇلدە ەنشىلەگەن كەزدە-اق ورىنداپ قويعان. قۇجاتتاردى راسىمدەۋگە قاجەتتى بارلىق پروتسەدۋرادان ۋاقىتىلى وتكەنىمەن، كۋالىكتى ءالى كۇنگە دەيىن قولىنا الماعان.
شايدوروۆ وزىنە ءومىرىنىڭ سوڭىنا دەيىن تولەم تاعايىندالعانىن سپورت مينيسترلىگى باسقاشا جەتكىزىپ جۇرگەنىن، تولەم 20 جىلدىق ەڭبەك وتىلىنەن كەيىن عانا تاعايىندالاتىنىن اتاپ ءوتتى. سپورتشىنىڭ جاسى بۇگىندە 21-دە.
وليمپيادا چەمپيونى جاڭا كەلىسىمشارتتىڭ تالاپتارىن تالقىلاۋ ءۇشىن وزىنە مامىر ايىنىڭ ورتاسىندا عانا حابارلاسقانىن، ونىڭ مەرزىمىنىڭ سوزىلۋى سوما نەمەسە كەلگىسى كەلمەگەننەن ەمەس، زاڭنامالىق ماسەلەگە بايلانىستى ەكەنىن اتاپ ءوتتى.
«2026 جىلدىڭ سوڭىنا دەيىن جارامدى كەلىسىمشارتتا 2030 جىلعى وليمپيادادا مەدال جەڭىپ الۋ تۋرالى مىندەتتەمە كورسەتىلگەن. ءبىز كوماندامىزبەن زاڭ تۇرعىسىنان وسى تارماقتى قايتا قاراۋدى عانا سۇرادىق. ويتكەنى بۇل قيسىنسىز ءارى مۇمكىن ەمەس نارسە. مەن 2026 جىلى تۇرىپ، تەك 4 جىلدان كەيىن وتەتىن وليمپيادانى ۇتىپ الا المايمىن عوي. ءبىز بۇل سۇراقتاردى زاڭگەرلەرگە جولداپ، وسى تارماقتى قايتا قاراۋدى وتىندىك، بىراق باق-تا ايتىلىپ جاتقانداي، وسى ۋاقىتقا دەيىن بىزبەن ەشكىم بايلانىسقا شىققان جوق»، – دەدى. ول تولەمدەردى جاساۋ مەن كەلىسىمشارتقا وتىرۋ ماسەلەلەرى مينيسترلىك تاراپىنان ادەيى سوزىلىپ وتىر دەپ سانايدى.
شايدوروۆ 5 ماۋسىمعا جوسپارلانعان وقۋ-جاتتىعۋ جيىنى مينيسترلىك تاراپىنان ەلەنبەي وتىرعانىن جەتكىزدى.
«بىرنەشە رەت قوڭىراۋ شالدىق، سمەتالاردى جىبەردىك، باعدارلامانى قويۋعا اقشا تولەي الا ما، وقۋ-جاتتىعۋ جيىندارىن قارجىلاندىرا ما، بيلەتتەردى ساتىپ الىپ بەرە مە دەپ سۇرادىق. الايدا بۇعان ەشقانداي ناقتى جاۋاپ تا بولعان جوق، سايكەسىنشە، ۇشۋىمىزعا ءبىر اپتا قالسا دا، بۇگىنگى كۇنگە دەيىن جيىنداردى ۇيىمداستىرۋ شارالارى جاسالمادى»، – دەيدى چەمپيون.
سپورتشى ەگەر ۋادە ەتىلگەن قارجىلاي قولداۋ بەرىلسە، ونى ءوز ەسەبىنەن دايىندىققا جۇمسايتىنىن، ماسەلەنى كوپشىلىككە شىعارۋعا ءماجبۇر بولمايتىنىن جەتكىزدى. سونىمەن بىرگە ول بولاشاقتا قولداۋ بولسا، قاراجاتتىڭ ءبىر بولىگىن بالالارعا كومەكتەسۋگە باعىتتايتىنىن دا ايتتى.
ەسكە سالا كەتەيىك، بۇعان دەيىن ميحايل شايدوروۆ تيمۋر بالىمبەتوۆكە بەرگەن سۇحباتىندا 5 ايدان بەرى ايلىق الماعانىن ايتقان ەدى. ارتىنشا مينيسترلىك بىردەن تۇسىنىكتەمە بەردى
