قازاقستاندىق شاحماتشى ءبيبىسارا اساۋباەۆا Norway Chess Women-2026 تۋرنيرىندەگى جەڭىستى سەرياسىن جالعاستىرىپ، ءتورتىنشى تۋردا الەم چەمپيونىن جەڭدى. بۇل تۋرالى 1bol.kz سپورت پورتالى جازدى، دەپ حابارلايدى "ادىرنا".
اساۋباەۆانىڭ بۇل جولعى قارسىلاسى ايەلدەر اراسىنداعى الەم چەمپيونى تسزيۋي ۆەنتسزيۋن بولدى. تارتىسقا تولى نەگىزگى پارتيا تەڭ ناتيجەمەن اياقتالعان سوڭ، جەڭىمپاز ارماگەددون فورماتىنداعى قوسىمشا ويىندا انىقتالدى.
شەشۋشى پارتيادا اق تاستارمەن ويناعان قازاقستاندىق شاحماتشى جوعارى دەڭگەيدەگى ويىن ورنەگىن كورسەتىپ، نەبارى 6 مينۋت 23 سەكۋند ىشىندە قارسىلاسىنان باسىم ءتۇستى. وسى جەڭىستىڭ ارقاسىندا ءبيبىسارا تۋرنيرلىك قورجىنىنا 1,5 ۇپاي قوسىپ، جالپى كورسەتكىشىن 7 ۇپايعا جەتكىزدى.
ءتورت تۋر قورىتىندىسى بويىنشا اساۋباەۆا Norway Chess Women-2026 ءتۋرنيرىنىڭ جەكە كوشباسشىسى اتانىپ وتىر. قازاقستاندىق سپورتشى الەمنىڭ ۇزدىك شاحماتشىلارىمەن باسەكەدە تۇراقتى ويىن كورسەتىپ، چەمپيوندىققا باستى ۇمىتكەرلەردىڭ ءبىرى ەكەنىن دالەلدەپ كەلەدى.
ايتا كەتەيىك، بەدەلدى حالىقارالىق Norway Chess Women 2026 جارىسى نورۆەگيانىڭ وسلو قالاسىندا وتۋدە. تۋرنيردە الەمنىڭ ەڭ مىقتى ايەل شاحماتشىلارى باق سىناپ جاتىر.
