اقتاۋلىق وقۋشىلار الماتىدا وتكەن رەسپۋبليكالىق روبوتوتەحنيكا جانە يننوۆاتسيالىق تەحنولوگيالار بويىنشا اشىق چەمپيوناتتا جەڭىسكە جەتتى.
اقتاۋ قالاسىنداعى نازارباەۆ زياتكەرلىك مەكتەبىنىڭ جاس ونەرتاپقىشتارى رەسپۋبليكالىق روبوتوتەحنيكا بويىنشا اشىق چەمپيوناتتا 1 ورىنعا يە بولدى.
ءداستۇرلى شارادا «Qarapaiymەmdeu»، «qMeta» جوبالارى تانىستىرىلدى.
QarapaimEmdeu - دياگنوزدى انىقتايتىن روبوت-تەراپەۆت جانە ءموبيلدى پلاتفورما، دەرەكتەردى ساقتايتىن مەديتسينالىق پورتال.
“روبوت-تەراپەۆتتىڭ ماقساتى دارىگەرلەردى الماستىرۋ ەمەس، ولاردىڭ جۇمىسىن جەڭىلدەتۋ ماقساتىندا دايىندالعان جوبا. روبوت اۋىرىپ كەلگەن ادامنىڭ ايتقان سيمپتومدارىنا قاراي دياگنوز قويىپ، ءارى قاراي ەمدەلۋ جولىن نەمەسە قانداي دارىگەرگە قارالۋ كەرەك ەكەندىگىن ايتادى”،- دەيدى جوبا اۆتورى كاميلا كۋاتوۆا
جەڭىسكە جەتكەن كوماندا مۇشەلەرى: دانيل مۋحالەۆ، كاميلا كۋاتوۆا، نۇرگۇل ءامىرحان، ۇلان ايتباي.
qMeta – ۆيرتۋالدى شىندىقتا ءبىلىم بەرۋ پلاتفورماسى. پلاتفورما «Oculus Quest 2» ۆيرتۋالدى شىندىق كوزىلدىرىگىندە قولدانىلادى. ۆيرتۋالدى شىندىقتا ستۋدەنتتەردىڭ مۇمكىندىكتەرى شەكسىز. مۇندا اتومداردىڭ ىدىراۋىنان باستاپ ورگانيكالىق بولشەكتەردىڭ ىدىراۋىنا دەيىن كەز كەلگەن تاجىريبەنى جۇرگىزۋگە بولادى دەيدى كوماندا مۇشەلەرى.
«qMeta» جوباسىنىڭ ماقساتى شىنايى ومىردە جۇزەگە اسىرۋ مۇمكىن ەمەس فيزيكالىق، حيميالىق تاجىريبەلەردى ۆيرتۋالدى شىندىق ارقىلى كورسەتۋ. بىرىنشىدەن بۇل پلاتفورما مۇعالىمنىڭ ساباق بەرۋ پروتسەسسىن جەڭىلدەتەدى، ەكىنشىدەن وقۋشىنىڭ ساپالى ءارى ناقتى ءبىلىم الۋىنا مۇمكىندىك بەرەدى”،- دەيدى جوبا اۆتورى راسۋل ابۋوۆ
«qMeta» كومانداسىنىڭ قاتىسۋشىلارى: راسۋل ابۋوۆ، اقبوبەك نىشانباي، ماعجان زاكاريا، ايسۇلتان باقتىعالي جانە ينفورماتيكا ءپانىنىڭ مۇعالىمى ءمادي مەدەت.
رەسپۋبليكا دەڭگەيىندە وتكەن روبوتوتەحنيكا بويىنشا اشىق چەمپيوناتقا 7 مەن 22 جاس ارالىعىنداعى وقۋشىلار مەن ستۋدەنتتەر قاتىستى. جىل سايىن ءداستۇرلى تۇردە ۇيىمداستىرىلاتىن جارىس بيىل 7 رەت وتۋدە.
“قاتىسۋشىلار نەگىزىنەن روبوتوتەحنيكا، جاڭا تەحنولوگيالار جانە باعدارلامالاۋ سالاسىندا سايىسقا ءتۇستى. چەمپيونات بيىل جەتىنشى رەت ۇيىمداستىرىلىپ وتىر. وعان 98 ءبىلىم مەكەمەسى قاتىستى. ءادىل قازىلار ۇسىنعان جوبالاردىڭ ىشىنەن الەۋمەتتىك ماسەلەلەردى شەشۋگە ارنالعان باعدارلاماعا باسا نازار اۋداردى”،- دەيدى «QarapaiymEmdeu»، «qMeta» جوبالارىنىڭ جەتەكشىسى ءمادي مەدەت
ءبىلىم بەرۋ ۇيىمدارى اراسىندا وتكەن چەمپيونات ەكى كۇنگە سوزىلدى. جەڭىمپاز اتانعان «Qarapaiym emdeu» كومانداسى ەلىمىزدەگى جەتەكشى جوعارى وقۋ ورىندارىنىڭ ءبىرى حالىقارالىق اقپاراتتىق تەحنولوگيالار ۋنيۆەرسيتەتىنە ءبىلىم گرانتىن جەڭىپ الدى. «qMeta» جوباسىنىڭ اۆتورلارى «IMAP business school» بيزنەس-مەكتەبىندە وقۋعا مۇمكىندىك الدى. سونداي اق جەڭىمپاز كوماندا قاتىسۋشىلارىنا 50.000 تەڭگە كولەمىندە قارجىلاي سىيلىق تابىستالدى.
