ەلىمىزدە بەت-ءجۇزىن تولىق جاۋىپ تۇراتىن كيىم كيگەنى ءۇشىن 1179 ادام جاۋاپكەرشىلىككە تارتىلدى. بۇل تۋرالى Polisia.kz جازدى، دەپ حابارلايدى «ادىرنا» ءتىلشىسىا
«تىيىم تەك قوعامدىق قاۋىپسىزدىكتى قامتاماسىز ەتۋگە باعىتتالعانىن جانە بەت-ءجۇزدى جاسىراتىن كەز كەلگەن كيىم تۇرىنە قاتىستى قولدانىلاتىنىن اتاپ وتەمىز. ىشكى ىستەر ورگاندارى زاڭ مەن ءتارتىپتى قامتاماسىز ەتۋ جۇمىستارىن جالعاستىرىپ، ازاماتتاردى قوعامدىق ورىنداردا بەلگىلەنگەن ەرەجەلەردى ساقتاۋعا شاقىرادى»،– دەدى ءىىم.
تىيىمدى بۇزعانى ءۇشىن جاۋاپكەرشىلىك اكىمشىلىك قۇقىق بۇزۋشىلىق تۋرالى كودەكستىڭ 434-3-بابىندا بەلگىلەنگەن. العاش رەت ءتارتىپ بۇزعان ازاماتقا ەسكەرتۋ جاسالادى. ال ءبىر جىل ىشىندە قايتالانعان جاعدايدا 10 ايلىق ەسەپتىك كورسەتكىش كولەمىندە ايىپپۇل سالىنادى.
قازاقستان مۇسىلماندارى ءدىني باسقارماسى بۇل تىيىمنىڭ قانداي دا ءبىر ءدىني سەنىمدى نەمەسە جەكە تاڭداۋدى شەكتەۋ ءۇشىن ەمەس، ەڭ الدىمەن، قوعامدىق قاۋىپسىزدىكتى قامتاماسىز ەتۋ ماقساتىندا ەنگىزىلگەنىن اتاپ وتكەن بولاتىن.
