استانادا «قالامگەرلەر اللەياسىنداعى» بەيىمبەت ءمايليننىڭ ەسكەرتكىشىنە شىعىپ الىپ، فوتوسەسسيا جاساعان قىزدىڭ كىم ەكەنىن انىقتالدى. بۇل تۋرالى قالالىق پوليتسيا دەپارتامەنتى جازدى، دەپ حابارلايدى «ادىرنا» ءتىلشىسى.
جەلىدە تاراعان كادرلاردا بويجەتكەننىڭ ەسكەرتكىشتىڭ يىعىنا ءمىنىپ، فوتوعا تۇسكەنى بايقالادى. جەلى قولدانۋشىلارى مۇنى مادەني مۇراعا جانە تاريحي تۇلعاعا قۇرمەتسىزدىك دەپ باعالادى.
پد مالىمەتىنشە، 18 جاستاعى استانا تۇرعىنى بايقوڭىر اۋدانىنىڭ پوليتسيا باسقارماسىنا جەتكىزىلگەن.
«قۇقىق بۇزۋشى ۇساق بۇزاقىلىق جاساعانى ءۇشىن جاۋاپتىلىققا تارتىلدى. ماتەريالدار شەشىم قابىلداۋ ءۇشىن سوتقا جولداندى. پوليتسيا وسىنداي ارەكەتتەرگە جول بەرىلمەيتىنىن جانە مادەنيەت نىساندارى مەن تاريحي مۇرالارعا ۇقىپتى ءارى قۇرمەتپەن قاراۋ قاجەتتىگىن ەسكەرتەدى»،–دەلىنگەن حابارلامادا.
سونىمەن قاتار پوليتسيا ەسكەرتكىشتەر مەن مادەني ورىندارعا قاساقانا زيان كەلتىرۋ ۆانداليزم بولىپ سانالۋى مۇمكىن ەكەنىن جانە جاۋاپكەرشىلىككە، سونىڭ ىشىندە قىلمىستىق جاۋاپكەرشىلىككە اكەپ سوعۋى مۇمكىن ەكەنىن اتاپ ءوتتى.
