بۇگىن الماتى قالاسىنداعى الەكساندر نەۆسكي شىركەۋىنىڭ اۋلاسىنا الەكساندر نەۆسكيدىڭ ەسكەرتكىشى قويىلدى، دەپ حابارلايدى Adyrna.kz اقپاراتتىق پورتالى.
الەكساندر نەۆسكيدىڭ ەسكەرتكىشى بۇگىن ساعات 11-00 شاماسىندا ارنايى جۇك كولىگىمەن شىركەۋ اۋلاسىنا جەتكىزىلدى. قازىر الدىن-الا دايىندالعان تۇعىرتاسقا ەسكەرتكىشتى ورناتۋ جۇمىستارى جۇرگىزىلىپ جاتىر.
ءبىزدىڭ تىلشىلەر سول ماڭدا جۇرگەن ءدىني كيىمدەگى، اتى-ءجونىن اتاۋدان باس تارتقان ازاماتقا بىرقاتار سۇراقتارىن قويعان ەدى.
- پرەزيدەنت قول قويدى. اكىمشىلىك اۋلا سىرتىنا قويۋعا رۇقسات ەتپەگەنىمەن, ىشىنە قويۋعا رۇقسات بەردى. بۇل جەر جەكەمەنشىكتەگى اۋماق سانالادى. ەندى مىنە، اۋليە الەكساندر نەۆسكيگە ەسكەرتكىش قويىپ جاتىرمىز.
- ەسكەرتكىشتىڭ اشىلۋ سالتاناتى قاشان وتەدى؟
- ەرتەڭ، 12-00-دە.
- ەسكەرتكىشتىڭ دەمەۋشىلەرى بار ما؟ كىم قارجىلاندىردى؟
- قارجى شىركەۋگە عيبادات ەتۋگە كەلۋشىلەردەن جينالدى. كوپتىڭ ساداقاعا بەرگەن اقشاسىنىڭ باسىن قوسىپ، اۋليە نەۆسكيگە ەسكەرتكىش ورناتۋدى شەشتىك. كىم قانشا اقشا بەرە الادى، سونى الدىق. ەشكىمدى قيناعان جوقپىز. الەكساندر نەۆسكي — اۋليە ادام، ول موناح. ءبىز ونى باتىر دەپ ەمەس، قاسيەتتى اۋليە ادام رەتىندە تانيمىز.
شىركەۋ قىزمەتكەرى ءتىلشىمىزدىڭ باسقا سۇراقتارىنا جاۋاپ بەرۋدەن باس تارتتى.
بۇعان دەيىن، اتالعان شىركەۋدىڭ رەسمي تاراتقان اقپاراتتارىندا ەسكەرتكىش رەسەي فەدەراتسياسى پرەزيدەنتىنىڭ كومەكشىسى، بۇرىنعى مادەنيەت ءمينيسترى، پروفەسسور ۆ. مەدينسكيدىڭ باستاماسىمەن جانە قارجىلاي كومەك كورسەتۋىمەن جاسالىپ جاتقانى ايتىلعان بولاتىن. ەسكەرتكىش اۆتورى رەسەي سۋرەتشىلەر اكادەمياسىنىڭ اكادەميگى، رەسەيدىڭ حالىق سۋرەتشىسى، پروفەسسور س. ششەرباكوۆ ەكەنى بەلگىلى بولعان.
ەرتەڭ، 13 شىلدە كۇنى كوپتىڭ نارازىلىعىنا قاراماستان، شىركەۋ اۋلاسىندا الەكساندر نەۆسكيدىڭ ەسكەرتكىشى اشىلادى. اشىلۋ سالتاناتىنا استانا جانە قازاقستاننىڭ ءميتروپوليتى الەكساندر قاتىسادى دەپ كۇتىلۋدە.
بۇدان الدىن تاريحشى نۇرلان اتىعاەۆ باق-قا بەرگەن سۇحباتىندا مىنا جايدى ايتقان بولاتىن.
"2021 - 2022 جىلدارى ورىستىڭ پراۆوسلاۆ شىركەۋى الماتى اكىمدىگىنە قالانىڭ قوعامدىق اۋماعىنا بيىكتىگى 5 مەترلىك الەكساندر نەۆسكيدىڭ ەسكەرتكىشىن ورناتۋ باستاماسىمەن جۇگىنگەن بولاتىن. زاڭ تالاپتارىنا سايكەس، الماتى قالاسىنىڭ تاريحي جانە مادەني ەسكەرتكىشتەرىن قورعاۋ جونىندەگى كوميسسيا بۇل ماسەلەنى بىرنەشە رەت قارادى. ول وتىرىستارعا كوميسسيا مۇشەسى بولعاندىقتان مەن دە قاتىسقانمىن. پراۆوسلاۆ شىركەۋى وكىلدەرىنىڭ الەكساندر نەۆسكيگە ارناپ ەسكەرتكىش ورناتۋ جونىندەگى ءوتىنىشى ءۇش رەت كەرى قايتارىلعانى ناقتى ەسىمدە. سوڭعى رەت كوميسسيا وسى جىلدىڭ مامىر ايىندا ەسكەرتكىشتى ورناتۋدان باس تارتقان ەدى. وسى ورايدا، مەنىڭ ءوزىم دە، ارىپتەستەرىم دە ۇسىنىلعان ەسكەرتكىشتىڭ الماتىنىڭ سونداي-اق جالپى قازاقستاننىڭ تاريحىنا قاتىسى جوق ەكەنىن اتاپ ايتقانبىز. بۇعان قوسا، قالا اۋماعىندا ەسكەرتكىشتەردى ورناتۋعا ارنالعان بوس جەر ۋچاسكەلەرى جوق دەسەك تە بولادى. سوندىقتان قازاقستاننىڭ كەيبىر تاريحي تۇلعالارىنا، مىسالى، قازاق حاندارىنا، باتىرلارىنا جانە ت.ب. ەسكەرتكىشتەر ءالى ورناتىلعان جوق. ءتىپتى ەسكەرتكىش قويۋ تۋرالى ۇكىمەت قاۋلىلارى شىققان تۇلعالار دا بار. الايدا، قاراجات پەن جەر ۋچاسكەلەرىنىڭ بولماۋىنا بايلانىستى ولارعا ەسكەرتكىشتەر ءالى ورناتىلمادى. نەۆسكيدىڭ ەسكەرتكىشىنە قاتىستى ارىپتەستەرىمنىڭ تاراپىنان وزگە دە بىرقاتار ەسكەرتپە ايتىلدى. ەسكەرتكىشتىڭ پروپورتسياسى بويىنشا دا ەسكەرتپەلەر بولعانى ەسىمدە. وسىنداي سەبەپتەردىڭ نەگىزىندە دە ۇسىنىس قابىلدانبادى،"- دەيدى تاريحشى.
نۇرلان اتىعاەۆ بۇعان قوسا بىلاي تولىقتىرا كەتتى.
"مەنىڭ بىلۋىمشە، ولارعا ءىس جۇزىندە ەشقانداي رۇقسات بەرىلگەن جوق. قازاقستاننىڭ پراۆوسلاۆ شىركەۋى ەسكەرتكىشتى ءوزىنىڭ اۋماعىندا، ياعني شىركەۋ اۋلاسىندا ورناتۋعا شەشىم قابىلداعان. البەتتە، مۇنداي جاعدايدا رەسمي رۇقسات بەرىلمەيدى ءارى ەسكەرتكىش ورناتۋ ماسەلەسى دە ءبىزدىڭ كوميسسيانىڭ قۇزىرەتىنە كىرمەيدى. جالپى بۇل – كەڭ تارالعان تاجىريبە،"- دەيدى تاريحشى نۇرلان اتىعاەۆ.
قانات بىرلىكۇلى
«ادىرنا» ۇلتتىق پورتالى
